Bakı, 26 avqust, AZƏRTAC

Media Təhlil Mərkəzi Azərbaycan Respublikasının Birinci vitse-prezidenti, Heydər Əliyev Fondunun prezidenti Mehriban Əliyevanın doğum günü ilə bağlı məqalə hazırlayıb.

AZƏRTAC məqaləni təqdim edir: “Azərbaycanın birinci xanımı Mehriban Əliyeva illər əvvəl Prezident İlham Əliyevə doğum günü münasibətilə arzularını bu cür ifadə etmişdi: “Mən ona Qarabağ düyününü açmaq üçün səbir arzulayıram. Mən inanıram ki, bu yolda İlham Əliyev qələbəni əldə edəcək!”. Əslində, bütün azərbaycanlıların ortaq hisslərini və duyğularını ehtiva edən bu sözlər o zaman müstəqillik tariximizin də, xalqımızın da ən böyük arzusu kimi səslənirdi. O vaxta qədər Heydər Əliyev Fondunun prezidenti kimi Azərbaycan həqiqətlərini, Qarabağ münaqişəsinin əsl mahiyyətini öz layihələri ilə beynəlxalq miqyasda təbliğ edən xanım Mehriban Əliyevanın Prezidentə ünvanladığı bu arzunun mahiyyətində hər bir fərdin, bütövlükdə xalqın müqəddəs hədəfi dayanmışdı: Qarabağ işğaldan mütləq azad olunacaq!..

Otuzillik düyün həmin təbrikin yazılmasından cəmi 6 il sonra açıldı. 2020-ci il sentyabrın 27-də başlayan Vətən müharibəsi 30 ildir canımızı boğazımıza yığan işğala son qoyurdu, biz milli maraqlara söykənən dövlətçilik fəlsəfəsinin təntənəsini yaşayaraq hədəflərimizə qovuşurduq, Vətən bütövləşirdi, dövlətin və xalqın qələbə ruhu Azərbaycan tarixinin ən parlaq səhifələrini yazırdı. Müharibənin başlanmasından iki gün sonra xanım Mehriban Əliyeva sosial şəbəkə paylaşımında bütün xalqın qəlbindən keçənləri bir cümlədə dəqiq ifadə etmişdi: “Qoy Uca Tanrı hər bir azərbaycanlıya müqəddəs Qarabağ torpağını öpməyi nəsib etsin!..”. Nəhayət birinci xanımın Prezidentə arzuladığı səbir qalib gəlmişdi və bu Qələbə bizi bir xalq kimi tariximizin, taleyimizin qürurverici məqamına yüksəltmişdi – müqəddəs Qarabağ torpağına yollar açılmışdı.

İndi tarixi Qələbədən dörd il ötür. Bu illərdə müstəqilliyin övladlarının azad etdikləri torpaqlarda Prezident İlham Əliyevin başlatdığı quruculuq siyasətinin ən fəal iştirakçılarından biri məhz xanım Mehriban Əliyevadır. Onun azad olunmuş torpaqlarda həyata keçirdiyi çoxsaylı layihələr Qarabağa öz simasını, milli kimliyini qaytarır. Şuşada muğam səslənir, “Xarıbülbül” festivalı, Vaqif Poeziya Günləri keçirilir. Mehriban xanımın rəhbərlik etdiyi Heydər Əliyev Fondu azad edilmiş ərazilərdə tarixi abidələri yenidən qurur, milli yaddaşı dirildir, bu torpaqlarda illərlə dağıdılan Azərbaycan izini bərpa edir, ona nəfəs, həyat verir. Qarabağın quruculuq kursunu onun zövqü və nəciblik prinsipləri zənginləşdirir. Mehriban Əliyevanı xalqa sevdirən həm də bu təəssübkeşliyidir, vətənpərvərliyidir, milli duyğularıdır.

2017-ci ildə Azərbaycan Respublikasının Birinci vitse-prezidenti təyin edilən Mehriban Əliyevanın ona qədər də, ondan sonra da əsas missiyası Prezidentin və xalqın etimadını doğrultmaq olub. Bu, onun fəaliyyətinin dəyişməz faktıdır. Bu prinsipi formalaşdıran isə xalqın ona olan sonsuz rəğbətidir. Ona görə də Mehriban xanımın Birinci vitse-prezident təyin edilməsi, ilk növbədə, cəmiyyətin sosial sifarişi, Prezidentin ölkədə başlatdığı islahatlar prosesinə ən böyük töhfə idi. Çünki Mehriban xanımın yüksək təşkilatçılıq qabiliyyəti, səriştəsi onun peşəkarlığının dövlət idarəçiliyinə də tətbiqini zərurətə çevirmişdi. Yeni vəzifəsinə başladığı ilk günlərdən o, bir daha sübuta yetirdi ki, Azərbaycan xalqının və dövlətinin maraqlarını beynəlxalq miqyasda qoruyur, xalqın mədəni-siyasi və tarixi-ictimai maraqlarını heç vaxt arxa plana keçirmir, parlaq dövlət xadimi kimi müasir Azərbaycan qadınının ictimai-siyasi obrazını uğurla təcəssüm etdirir, uğurlu fəaliyyəti ilə ölkəmizin siyasi-iqtisadi, sosial-mədəni tərəqqisinə töhfə verir. Birinci xanım ən çox qayğıya ehtiyacı olan insanları axtarır, onlara kömək etməyi özünün bir nömrəli borcu bilir. Mehriban xanım diqqətini, ilk növbədə, həssas təbəqəyə yönəldir, qaçqınların və məcburi köçkünlərin həyat və yaşayış şəraitinin yaxşılaşdırılmasını fəaliyyətinin prioriteti elan edir. “Mən sizin sevginizi, dəstəyinizi hiss edəndə daha inamlı oluram. Mənim üçün böyük şərəfdir ki, insanlar mənə dəstək verir, məni sevir, mənə inanır” deyən Birinci vitse-prezident bu kateqoriyadan olan insanlarda Vətən imanını ölməyə qoymadı, dövlətin hər zaman onların arxasında dayandığını göstərdi. Həm də təsdiqlədi ki, o, öz ölkəsini yaxşı tanıyır və Vətənə xidmət etməyin bütün meyarlarını çox gözəl bilir.

2004-cü ildə Heydər Əliyev Fondunun fəaliyyətə başlaması Azərbaycanda böyük ənənələri, tarixi olan xeyriyyəçilik məktəbinin yenidən dirçəlməsinə və yaşadılmasına çox ciddi təkan verdi. Heydər Əliyev Fondu yarandığı gündən bütün diqqətini cəmiyyəti narahat edən, Azərbaycan vətəndaşlarının həyatı, sağlamlığı, təhsili ilə bağlı olan sahələrə yönəltdi. Məqsədlər o qədər aydın və ali idi ki, qısa vaxtda Heydər Əliyev Fondu yardıma ehtiyacı duyan hər bir kəsin ümid yeri və istinadgahına çevrildi. Mehriban xanım deyir ki, “cəmiyyətdə bütün ağır, çətin problemləri xeyirxahlıqla, insansevərliklə, mərhəmətlə həll etməyə çalışmaq lazımdır. Bu, vətəndaş cəmiyyətinin formalaşmasında ən əsas şərtlərdən biridir”. Bu cəmiyyəti formalaşdırmaq isə gələcəyimiz olan uşaqlara diqqət və qayğıdan başladı. Mehriban Əliyeva xeyirxahlığın və mərhəmətin ilk ünvanı kimi uşaqları seçdi. Uşaq evləri, internat məktəbləri yenidən quruldu, onların maddi-texniki bazası möhkəmləndirildi. Uşaq evlərində tərbiyə alan və 18 yaşı tamam olmuş qızların mənzillərlə təmin edilməsi ilə bağlı çox mühüm problem həllini tapdı. Heydər Əliyev Fondunun “Yeniləşən Azərbaycana yeni məktəb” layihəsi də müasir tariximizin ən böyük sosial hadisələrindən birinə çevrildi. Bundan əlavə, Heydər Əliyev Fondu “Diabetli uşaqlara ən yüksək qayğı” və “Talassemiyasız həyat naminə” proqramlarını reallaşdırdı. Mehriban xanım deyir ki, “Mən konkret iş görmək, konkret insanlara kömək etmək istəyirəm. Konkret problemləri həll etmək, yardım edə bildikdə sevinc hissi keçirmək və səndən asılı olmayan səbəblər üzündən nəsə edə bilmədikdə təəssüflənmək, qəzavü-qədər, sağalmaz xəstəlik qarşısında bütün gücsüzlüyünü dərk edərkən əziyyət çəkmək, xilas edilmiş bir uşağın təbəssümünü gördükdə isə bir daha sevinmək istəyirəm. Bu, mənim seçimimdir”.

Mehriban xanım Əliyeva milli-mənəvi dəyərlərimizin əsas qoruyucusu kimi dini ocaqların bərpasına xüsusi diqqət yetirdi. “Tolerantlığın ünvanı Azərbaycan” layihəsi çərçivəsində həm İslam, həm də başqa dinlərə mənsub müqəddəs ocaqlar bərpa olundu. O, Azərbaycandakı idman hərəkatına da dəyərli töhfələr verdi. Azərbaycan Gimnastika Federasiyasına rəhbərlik edən Mehriban xanım 2015-ci ildə keçirilən Birinci Avropa Oyunlarının və 2017-ci ildə baş tutan IV İslam Həmrəyliyi Oyunlarının Təşkilat komitələrinə rəhbərlik edib. İkiillik qısa fasilə ilə Bakıda keçirilən və proqramı vətənpərvərlik məzmunu ilə zəngin olan bu beynəlxalq idman yarışları Mehriban xanım Əliyevanın yüksək təşkilatçılıq qabiliyyəti sayəsində dünyada böyük rəğbət qazanıb və keyfiyyət standartı ilə seçilib.

Birinci xanım, eyni zamanda, xaricdə həyata keçirdiyi uğurlu layihələri ilə beynəlxalq miqyasda böyük hörmət və nüfuz qazanıb. O, Romada Müqəddəs Marçellinio və Pietro katakombalarının bərpasında, Luvr muzeyində İslam incəsənəti bölməsinin yaradılmasında, Strasburq Kafedral kilsəsinin XIV əsrə aid olan beş pəncərəsinin, Berlin qəsrinin, Bolqarıstanda “Trapezitsa” Memarlıq Muzeyi Qoruğunun bərpasında və bu kimi digər çoxsaylı layihələrin icrasına dəstək verib. Onun xidmətləri sayəsində Azərbaycan Vatikanda mədəni dəyərlərinin nümayiş olunduğu sərgi təşkil edən ilk müsəlman ölkəsi kimi tarixə düşüb.

“Həyatda hər bir kəsin yerini və taleyini tarix müəyyənləşdirir. Odur ki, nə böyük, nə də kiçik rollar olmur. Öz həyat kitabını yazmağa ancaq sənin şəxsi və dərk edilmiş məsuliyyətin imkan verir. Kimsənsə elə də olmalısan. Bax, budur bizim həyatımız!”, - deyən Mehriban Əliyeva Azərbaycan tarixinə xalqına sonsuz məhəbbəti, gördüyü əzəmətli quruculuq işlərinin miqyası və xeyriyyəçilik əməlləri ilə daxil olub. Çünki Mehriban xanım Əliyeva xeyirxahlıq yolunu seçib, yardıma ehtiyac duyan hər kəsin yanında olmaq, insanlara yaxşılıq etmək onun həyat amalıdır”.