“Ümid Yeri”ndə uşaqlara bayram sevinci yaşadılıb
Bakı, 28 may, AZƏRTAC
“Modern İnkişaf və Ailə” İctimai Birliyinin təşkilatçılığı ilə “Ümid Yeri” Uşaq Sığınacağında görüş keçirilib.
İctimai Birlikdən AZƏRTAC-a bildirilib ki, tədbir valideyn himayəsindən məhrum, sosial risk qrupuna aid uşaqlara mənəvi dəstək göstərilməsi, onların asudə vaxtının səmərəli təşkili, sosial diqqətlə əhatə olunması, eləcə də müqəddəs Qurban bayramı, 28 May – Müstəqillik Günü, 1 İyun – Uşaqların Beynəlxalq Müdafiəsi Günü münasibətilə uşaqlarda bayram əhval-ruhiyyəsinin yaradılması məqsədi daşıyıb.
Görüşdə “Modern İnkişaf və Ailə” İctimai Birliyinin sədri Zərifə Quliyeva çıxış edərək ölkəmizdə uşaqlara, xüsusilə həssas kateqoriyaya aid azyaşlılara göstərilən dövlət qayğısının ardıcıl xarakter daşıdığını vurğulayıb. O bildirib ki, Prezident İlham Əliyevin rəhbərliyi ilə həyata keçirilən sosial siyasətin mərkəzində insan amili, uşaqların sağlam, təhlükəsiz və qayğı ilə əhatə olunan mühitdə böyüməsi dayanır.
Zərifə Quliyeva qeyd edib ki, ölkəmizdə uşaqların hüquqlarının qorunması, sosial müdafiəsinin gücləndirilməsi, təhsil, sağlamlıq və mənəvi inkişaf imkanlarının genişləndirilməsi dövlət siyasətinin mühüm istiqamətlərindən biridir.
İctimai birliyin sədri bildirib ki, Mehriban xanım Əliyevanın rəhbərliyi ilə Heydər Əliyev Fondunun uşaqlarla, xüsusilə valideyn himayəsindən məhrum və xüsusi qayğıya ehtiyacı olan azyaşlılarla bağlı həyata keçirdiyi layihələr cəmiyyətimizdə mərhəmət, xeyirxahlıq və humanizm dəyərlərinin daha da möhkəmlənməsinə mühüm töhfə verir.
Zərifə Quliyeva vurğulayıb ki, həyatın çətin sınaqları ilə erkən yaşda üzləşən uşaqlara diqqət göstərmək hər bir vətəndaşın mənəvi borcudur. Onun sözlərinə görə, belə görüşlər uşaqlarda xoş ovqat yaratmaqla yanaşı, onların cəmiyyətin diqqət və qayğısı ilə əhatə olunduğunu hiss etmələrinə mühüm töhfə verir.
Tədbir çərçivəsində uşaqlar üçün əyləncəli proqram təqdim olunub, müxtəlif çıxışlar və maraqlı oyunlar təşkil edilib. Balacalar proqramı böyük sevinclə qarşılayıblar. Eyni zamanda uşaqlar üçün bayram süfrəsi açılıb.
Sonda “Modern İnkişaf və Ailə” İctimai Birliyi tərəfindən uşaqlara hədiyyələr təqdim olunub.
Bölmənin digər xəbərləri
