Yunanıstanda Qərbi Nil virusuna yoluxaraq ölənlərin sayı 30-a çatıb
Afina, 14 sentyabr, AZƏRTAC
Yunanıstanda Qərbi Nil virusunun yayılması son illərin ən ciddi epidemioloji problemlərindən birinə çevrilib.
AZƏRTAC xəbər verir ki, “Kathimerini” nəşrinin məlumatına görə, bu il ölkədə 324 yoluxma halı qeydə alınıb. Onlardan 217-də mərkəzi sinir sisteminin zədələnməsi ilə müşayiət olunan ağırlaşmalar aşkarlanıb. Virusla əlaqədar ölənlərin sayı 30-a yüksəlib.
Son həftə ərzində 34 yeni yoluxma və 6 ölüm halı qeydə alınıb. Səhiyyə qurumlarının məlumatına görə, yoluxmaların, xüsusilə Attika regionunda intensivliyi yüksəkdir. Yoluxma hallarının 56 faizdən çoxunun bu bölgənin payına düşdüyü bildirilir.
Mütəxəssislər faktiki yoluxma sayının rəsmi statistikadan xeyli yüksək ola biləcəyini vurğulayırlar. Qərbi Nil virusuna yoluxanların təxminən 80 faizində heç bir simptom yaranmır, ağır nevroloji fəsadlar isə yoluxanların 1 faizindən azında inkişaf edir.
Avropa Xəstəliklərin Qarşısının Alınması və Nəzarəti Mərkəzi yaxın həftələrdə yeni halların qeydə alınacağını istisna etmir.
Mütəxəssislər ağcaqanadlara qarşı dərmanlama ilə yanaşı, onların çoxalma yerlərinin sistemli monitorinqinin və erkən xəbərdarlıq mexanizmlərinin yaradılmasının vacibliyini bildirirlər.
Xüsusilə yaşlı şəxslərin və immun sistemi zəif insanların ağır xəstəlik riski daha yüksək hesab olunur. Yunanıstanın səhiyyə qurumları əhalini ağcaqanad dişləmələrindən qorunmaq üçün fərdi profilaktik tədbirlərə əməl etməyə çağırır.
Yunanıstanın populyar turizm istiqaməti olması səbəbindən epidemioloji vəziyyət ölkəyə səfər edən xarici turistlər üçün də diqqət tələb edən məsələdir.
Bölmənin digər xəbərləri
