“PREGEN – evlilik öncəsi məktəb” gənclərin ailə həyatına hazırlığını dəstəkləyir
Bakı, 14 sentyabr, AZƏRTAC
Son illər Azərbaycanda erkən nikahların artması, evliliklə bağlı düşünülməmiş qərarların verilməsi və boşanma hallarının yüksək olması cəmiyyət üçün narahatlıq doğuran məsələlərdəndir. Bu sosial problemlərin qarşısının alınması və ailə institutunun möhkəmləndirilməsi məqsədilə UNEC İnklüziv Təhsil Mərkəzi “PsixoSən” psixoloji dəstək platforması ilə birgə “PREGEN – evlilik öncəsi məktəb” layihəsinin icrasına başlayıb.
Bu barədə AZƏRTAC-a UNEC İnklüziv Təhsil Mərkəzinin direktoru Sevinc Məhsimova məlumat verib. O qeyd edib ki, layihənin əsas məqsədi gənclərin ailə həyatı barədə məlumatlılığını artırmaq, onları evliliyə daha şüurlu və məsuliyyətli yanaşmağa təşviq etməkdir. Layihə çərçivəsində Azərbaycanın bir sıra universitetlərində maarifləndirici seminarlar, təlimlər və interaktiv sessiyalar təşkil olunub.
Tədbirlərdə psixoloqlar, ailə münasibətləri üzrə mütəxəssislər, hüquqşünaslar və sosial işçilər iştirak edərək gənclərə ailə həyatının müxtəlif aspektləri barədə məlumat veriblər.
Sevinc Məhsimova bildirib ki, layihə çərçivəsində gənclər ailə dəyərlərinin qorunmasının əhəmiyyəti, sağlam ailə münasibətlərinin formalaşdırılması yolları, ailə psixologiyası və münaqişələrin konstruktiv həlli barədə biliklər əldə edirlər. Həmçinin ailə daxilində empatiya, qarşılıqlı anlaşma və məsuliyyət hissinin inkişaf etdirilməsi ilə bağlı praktiki bacarıqlar aşılanır. Onun sözlərinə görə, “PREGEN – evlilik öncəsi məktəb” layihəsi ailə institutunun dayanıqlığının gücləndirilməsi ilə yanaşı, gənclərin fərdi rifahına və cəmiyyətin sosial sabitliyinə də töhfə verir.
“Layihənin ilkin nəticələri göstərir ki, bu cür maarifləndirici tədbirlər gənclərin evlilik qərarlarını daha düşünülmüş şəkildə verməsinə və sağlam ailə modelinin formalaşmasına müsbət təsir göstərir”, – deyə UNEC İnklüziv Təhsil Mərkəzinin direktoru vurğulayıb.
Bölmənin digər xəbərləri
