“İstiqlal söhbətləri” kitabının təqdimatı olub
Bakı, 14 sentyabr, AZƏRTAC
Bu gün Mətbuat Şurasında (MŞ) Azərbaycan mətbuatının cəfakeş araşdırmaçısı ustad Şirməmməd Hüseynovun “İstiqlal söhbətləri” kitabının təqdimatı keçirilib.
AZƏRTAC xəbər verir ki, tədbiri giriş sözü ilə açan MŞ-nin sədri Rəşad Məcid bildirib ki, yeni çapdan çıxmış nəşrdə Əməkdar jurnalist, Real TV-nin rəhbəri Mirşahin Ağayevin müxtəlif illərdə Şirməmməd Hüseynovla həm ANS TV-dəki, həm də Real TV-dəki müsahibələrinin, həmçinin yutubdakı səs yazılarının mətni toplanıb. Bütün bu işlər Azərbaycan Milli Elmlər Akademiyasının Ədəbiyyat İnstitutunun əməkdaşı Rəşid Kərimli tərəfindən başa çatdırılıb. Müsahibələri Bakı Dövlət Universitetinin (BDU) kafedra müdiri, professor Qulu Məhərrəmli və Şəki Pedaqoji Kollecinin müəllimi Ramiz Orsər redaktə ediblər.
Rəşad Məcid onu da bildirib ki, Şirməmməd Hüseynovun dünyasını dəyişməsindən sonra onun həyat yoldaşı Ülkər Hüseynova tərəfindən ustadın bir sıra kitabları nəşr olunub: “İstiqlal söhbətləri” də onlardan biridir. Kitabı məxsusi edən isə Mirşahin Ağayevin mahir jurnalist sənətkarlığıdır. Ona görə də bugünkü təqdimatı həm də onun ilk kitabının təqdimatı kimi də dəyərləndirmək mümkündür”.
Real TV-nin rəhbəri Mirşahin Ağayev çıxışında nəşrin ərsəyə gəlməsində Ülkər Hüseynovanın rolunu xüsusi vurğulayıb, ona təşəkkürünü çatdırıb. O, Şirməmməd Hüseynovun “tarix dünənin jurnalistikası, jurnalistika bu günün tarixidir” fikirlərinə söykəndiyini bildirib, “İstiqlal söhbətləri”nin Azərbaycan tarixinin tədqiqi baxımından müstəsna əhəmiyyətinə diqqət çəkib. Mirşahin Ağayev, həmçinin Şirməmməd Hüseynov yaradıcılığının xalq, dövlət naminə dərin məsuliyyət hissi olduğunu vurğulayıb və bu məqamın müsahibələrdən duyulduğunu da bildirərək, nəşrin hər bir azərbaycanlının stolüstü kitabı olması zərurətini əsaslandırıb.
Çıxış edənlərdən “İstiqlal söhbətləri” kitabının redaktorları - Şəki Pedaqoji Kollecinin müəllimi Ramiz Orsər və MŞ-nin İdarə Heyətinin üzvü, BDU-nun Jurnalistika fakültəsinin professoru Qulu Məhərrəmli, həmçinin həmin fakültənin professoru Cahangir Məmmədli, MŞ-nin İdarə Heyətinin üzvü, “Xalq qəzeti”nin baş redaktoru Əflatun Amaşov, Əməkdar jurnalist Flora Xəlilzadə, tarix elmləri doktoru, professor Solmaz Rüstəmova-Tohidi, MŞ-nin İdarə Heyətinin üzvü, “Şərq” qəzetinin baş redaktoru Akif Aşırlı, MŞ-nin İdarə Heyətinin üzvü, Modern Media Qrupunun rəhbəri Elşad Eyvazlı, BDU-nun Jurnalistika fakültəsinin Milli mətbuat tarixi kafedrasının müəllimi Samir Xalidoğlu, BDU-nun Multimedia və elektron kommunikasiya kafedrasının professoru Allahverdi Məmmədli, BDU-nun Milli mətbuat tarixi kafedrasının dosenti Aygül Əzimova və başqaları təqdimatı keçirilən nəşri ustad Şirməmməd Hüseynovun ruhuna ehtiramın növbəti bariz nümunəsi kimi dəyərləndiriblər. Onlar, həmçinin Şirməmməd Hüseynov yaradıcılığının dövlətçilik amallarına xidmət ruhunda qurulduğunu bildirərək, “İstiqlal söhbətləri”ndə toplanmış materialların və müsahibələrin bu baxımdan yüksək əhəmiyyətini önə çəkərək, kitabı həm Azərbaycan tarixi, həm də mətbuat tariximiz üçün vacib edən məqamlara nəzər salıb, ustadla bağlı xatirələrini bölüşüblər.
Sonda çıxış edən Şirməmməd Hüseynovun həyat yoldaşı Ülkər Hüseynova toplantı iştirakçılarına təşəkkürünü bildirib.
Bölmənin digər xəbərləri
