Məişət zorakılığına məruz qalan şəxslər sosial reabilitasiya xidmətləri ilə əhatə olunur
Bakı, 30 noyabr, AZƏRTAC
Əmək və Əhalinin Sosial Müdafiəsi Nazirliyinin tabeliyindəki Sosial Xidmətlər Agentliyinin Həssas əhali qruplarından olan şəxslər üçün Sığınacaq və Sosial Reabilitasiya Müəssisəsinin bir bölməsi də məişət zorakılığından zərər çəkmiş şəxslər üçün nəzərdə tutulub.
Nazirliyin İctimaiyyətlə əlaqələr şöbəsindən AZƏRTAC-a verilən məlumata görə, 2021-ci il avqustun 1-də fəaliyyətə başlayan bölməyə ötən dövrdə 127 nəfər (48 qadın, 79 uşaq), o cümlədən bu il 78 nəfər şəxs qəbul edilib.
Bölməyə qəbul olunan şəxslərin sosial reabilitasiyası və sosial statuslarının bərpası sahəsində fərdi plan əsasında işlər aparılır.
Onların ilkin tibbi müayinəsi, psixoloji-emosional vəziyyətinin qiymətləndirilməsi, ilkin tibbi yardımla təmin edilməsi, hüquqlarının müdafiəsi və s. üçün də tədbirlər görülür.
Burada sakinlərin yaşayışı, sosial reabilitasiya tədbirlərinə cəlb edilməsi və asudə vaxtlarının təşkili üçün müasir şərait yaradılıb.
Bölmənin digər xəbərləri
