Merkel əmindir ki, AFR-in hər bir hökuməti İsrailin təhlükəsizliyini dəstəkləyəcək
Berlin, 11 oktyabr, AZƏRTAC
Angela Merkelin İsrailə səkkizinci səfəri başa çatıb. Görünür, bu səfər Merkelin AFR federal hökumətinin başçısı qismində Yaxın Şərqin bu ölkəsinə sonuncu səfəri olacaq.
AZƏRTAC xəbər verir ki, Merkelin İsrailə bu səfəri avqustun sonunda gözlənilirdi, lakin o vaxt Əfqanıstanda vəziyyət gərgin olduğuna görə bu tədbiri təxirə salmalı olmuşdular.
Merkel İsrailin Baş naziri Naftali Bennet ilə görüşüb və İkinci Dünya müharibəsi dövründə nasistlər tərəfindən məhv edilmiş 6 milyon yəhudinin xatirəsinə ucaldılmış Yad Va-şem memorialını ziyarət edib.
Almaniya KİV-ləri bu rəsmi səfərin yekunlarını yüksək qiymətləndirib. Əsas yekun belədir: Merkel israilli həmkarını əmin edib ki, onun ölkəsi Holokost ilə bağlı yəhudi dövlətinin qarşısında öz üzərinə götürdüyü öhdəliklərə sadiq qalacaq. Merkelin sözlərinə görə, İsrailin təhlükəsizliyi məsələsi gələcəkdə Almaniyanın istənilən hökumətinin Yaxın Şərq siyasətində əsas problem olacaq. Bu, İsrailə münasibətdə o qədər də dost olmayan ölkədə nüvə silahı təhlükəsinə də aiddir.
Merkel Benet ilə görüşdə deyib: “Mən fürsətdən istifadə edib vurğulamaq istəyirəm ki, İsrailin təhlükəsizliyi mövzusu Almaniyanın hər bir hökuməti üçün xüsusi əhəmiyyət kəsb edən əsas mövzu olacaq”.
Naftali Bennet həmkarına belə cavab verib: “Bizi hədələyən ölkələrlə İsrail arasında münaqişədə bitərəfliyi saxlayanlar mənəvi kompasını itiriblər. Siz isə, xanım Kansler, uzun illər boyu İsraili güzəştsiz dəstəkləmək kursunu həyata keçirməklə bütün Avropa qitəsi üçün mənəvi kompas olmusunuz”.
Vüqar Seyidov
AZƏRTAC-ın xüsusi müxbiri
Berlin
Bölmənin digər xəbərləri
