MƏRKƏZİ SEÇKİ KOMİSSİYASINDA SEMİNAR-MÜŞAVIRƏ KEÇİRİLMİŞDİR

04.04.2006 [21:38]
Çap et
A⁺ A^-

Mərkəzi Seçki Komissiyasının mətbuat xidmətindən AZƏRTAC-a bildirmişlər ki, aprelin 4-də MSK-da Azərbaycan Respublikasının üçüncü çağırış Milli Məclisinə 9 saylı Binəqədi ikinci, 31 saylı Suraxanı ikinci, 38 saylı Nizami ikinci (Gəncə), 42 saylı Sumqayıt ikinci, 44 saylı Sumqayıt–Abşeron, 69 saylı Cəlilabad–Masallı–Biləsuvar, 103 saylı Gədəbəy, 106 saylı Tovuz–Qazax–Ağstafa, 110 saylı Zaqatala və 119 saylı Ağdam kənd seçki dairələrində 2006-cı il mayın 13-nə təyin edilmiş təkrar seçkilərin hazırlanması və keçirilməsi ilə əlaqədar müşavirə keçirilmişdir. Müşavirədə Mərkəzi Seçki Komissiyasının üzvləri, MSK Katibliyinin məsul işçiləri, həmin seçki dairələri dairə seçki komissiyalarının üzvləri, ABŞ səfirliyinin və Seçki Sistemləri üzrə Beynəlxalq Fondun təmsilçiləri və kütləvi informasiya vasitələrinin nümayəndələri iştirak etmişlər.

Müşavirəni giriş sözü ilə Mərkəzi Seçki Komissiyasının sədri Məzahir Pənahov açaraq bildirmişdir ki, təkrar seçkilər də əvvəlki seçkilər kimi şəffaf və demokratik keçirilməlidir. Ötən seçkilərdəki səhvlərdən nəticə çıxarılmalı, demokratik standartlara uyğun seçki keçirilməlidir. Demokratik seçkinin keçirilməsi elə Seçki Məcəlləsinin tələblərinə uyğun seçki keçirilməsi deməkdir. Çünki Seçki Məcəlləsi də beynəlxalq qurumların tövsiyələrinə və Avropanın demokratik dəyərlərinə uyğun bir hüquqi sənəddir. Dövlətimizin başçısı İlham Əliyevin də qəti mövqeyi təkrar seçkilərin demokratik və qanunun tələblərinə uyğun keçirilməsindən, vətəndaşların seçmək, seçilmək hüquqlarının yüksək səviyyədə təmin edilməsindən ibarətdir. Azərbaycan Prezidenti bu məsələ ilə bağlı öz siyasi iradəsini əvvəlki seçkilərdə də ortaya qoymuşdu. 6 noyabr seçkilərində olduğu kimi, bu seçkilərdə də qanun pozuntusuna yol verən şəxslər ciddi cəzalandırılacaqlar.

MSK sədri hazırda seçkiqabağı təşviqat prosesinin getdiyini xatırladaraq qeyd etmişdir ki, bütün namizədlərə bərabər şərait yaradılmalıdır. Sədr seçicilərin maarifləndirilməsi proqramının davam etdiriləcəyini və aşağı seşki komissiyalarının üzvləri üçün treninqlərin keçiriləcəyini də bildirmişdir.

Sonra Mərkəzi Seçki Komissiyasının katibi Natiq Məmmədov “Milli Məclisə təkrar seçkilərdə namzidələrin sənədlərinin qanunun tələblərinə uyğun DSK-larda yoxlanılması və qeydə alınmasının nəticələri” mövzusunda məruzə etmişdir.

MSK katibinin çıxışından sonra DSK-ların sədrləri gördükləri işlər barədə məlumat vermişlər.

Tədbirin sonunda Mərkəzi Seçki Komissiyasının sədri seçki komissiyaları üzvlərinin suallarını cavablandırmışdır.