Məşqçi Nicat Qarayev: Məqsədimiz Avropa Gənclər Olimpiya Festivalına yaxşı hazırlaşmaqdır
Astana, 19 may, AZƏRTAC
Qazaxıstanın paytaxtı “Silk Way Series Astana” beynəlxalq velosiped turnirinə ev sahibliyi edib. Yarışda Azərbaycan da daxil olmaqla, bir sıra ölkələrin idmançıları öz qüvvələrini sınayıblar. Trek velosipedi üzrə Azərbaycan yığması bu turnirdə iki bürünc medal qazanıb. İdmançılarımızdan Vikrotiya Sidorenko 200 metr məsafəyə sprint növündə, Məryəm Hüseynova isə omnium yarışında 3-cü nəticə göstərib.
AZƏRTAC-a açıqlama verən məşqçi Nicat Qarayev bildirib ki, komandamız həm “Silk Way Series Astana” turnirində, həm də Qazaxıstan çempionatında medallar uğrunda mübarizə aparmaq üçün mayın 10-da Astana şəhərinə gəlib. “Təlim-məşq toplanışlarımız mayın 10-da başlayıb, yarışlara isə mayın 15-də start verilib”, – o qeyd edib.
Məşqçi əlavə edib ki, yığma komandanın bəzi idmançıları üçün bu yarış mövsümdə ilk beynəlxalq turnir olub: “Buna, baxmayaraq idmançılarımız özlərini çox yaxşı tərəfdən göstərdilər və bu, bizi son dərəcə sevindirdi. Ümid edirik ki, qarşıdakı yarışlarda da uğurlu çıxış edərək Vətənə medallarla qayıdacağıq”.
Nicat Qarayev bildirib ki, yığma komandamız daha əvvəl Bolqarıstan və Özbəkistanda keçirilən beynəlxalq turnirlərdə çıxış edib.
Məşqçi əsas məqsədlərinin Avropa Gənclər Olimpiya Festivalına yaxşı hazırlaşmaq olduğunu vurğulayıb: “Qazaxıstandakı bu yarış məhz həmin festivala hazırlıq xarakteri daşıyır. Uğurlu çıxış etmək üçün beynəlxalq təcrübə toplamalıyıq”, – deyə o söyləyib.
Elşən Rüstəmov
AZƏRTAC-ın xüsusi müxbiri
Astana
Bölmənin digər xəbərləri
