Metronun “Xocasən” deposunu “Avtovağzal” stansiyası ilə birləşdirən tunellərdən birinin qazıntı işləri tamamlanıb
Bakı, 30 aprel, AZƏRTAC
Metronun tikilməkdə olan “Xocasən” deposunu “Avtovağzal” stansiyası ilə birləşdirən tunellərdən birinin qazıntı işləri tamamlanıb.
“Bakı Metropoliteni” QSC-nin mətbuat xidmətindən AZƏRTAC-a bildirilib ki, bütün metropolitenlərə dair inşaat normaları və qaydalarına, həmçinin digər normativ tələblərə əsasən, istismar olunan hər metro xəttinin öz deposu olmalıdır. Hazırda Bakı metrosunun 3 xətti və yalnız bir deposu fəaliyyət göstərir. Qırmızı xəttin “Nərimanov” elektrik deposu hazırda Yaşıl xəttə də xidmət göstərir. Yaşıl xəttin “Dərnəgül” deposunda isə inşaat işləri aparılır
2016-cı il aprelin 19-da ilk iki stansiyası istismara verilmiş Bənövşəyi xəttin “Xocasən” qəsəbəsində yerləşən deposunun da layihələndirmə və tikintiyə hazırlıq işləri yerinə yetirilir.
Bu gün şərti adı “Xocasən” olan deponun inşasında ilk əhəmiyyətli hadisə baş verib. Bənövşəyi xəttin deposunu metronun “Avtovağzal” stansiyası ilə birləşdirən iki tuneldən birinin qazıntı işləri artıq tamamlanıb.
İnşasına 2012-ci ilin iyul ayında başlanmış 1112 metr uzunluğunda sağ tunelin qazıntı işləri xüsusi ağır hidrogeoloji şəraitdə aparılıb. Metropoliten tunel qazıntısında istifadə olunan müasir “Herrenknecht” və “Robbins” tunelqazma kompleksləri 2011-ci ildən “Avtovağzal” stansiyasından başlamaqla əks istiqamətə qazıntı apardığı üçün onlardan “Xocasən” deposunun tunellərinin qazıntısında istifadə etmək mümkün olmayıb. Buna görə də digər texniki səbəblər nəzərə alınmaqla qazıntı işləri sipər qurğusundan istifadə etməklə yerinə yetirilib.
“Xocasən” deposunu “Avtovağzal” stansiyası ilə birləşdirən və inşası yekunlaşmış diametri 5,5 metr olan sağ tunelin yerləşdiyi coğrafi ərazinin torpaq qatının dayanıqsızlığı ilə yanaşı, zəngin qrunt suları, həmçinin ərazidə kanalizasiya xətlərinin olmaması səbəbindən müxtəlif çirkab suların təsiri də nəzərə alınmaqla, tunel qazıntısı daim diqqət mərkəzində saxlanılıb. Tunelin yaxınlığında yerləşən 60-dan çox yaşayış evinin, respublika əhəmiyyətli dəmiryol xəttinin, habelə mühüm mühəndis kommunikasiya xətlərinin yerləşdiyi sahələrin altından keçməsi də, xüsusi qabaqlayıcı tədbirlərin yerinə yetirilməsini tələb edib. Məhz bu səbəblərdən hər bir gözlənilməz qəza vəziyyətinin yaranmamasına inşaatın bütün dövründə xüsusi nəzarət edilib.
Həmçinin belə halların qarşısının vaxtında alınması məqsədilə, əlavə qabaqlayıcı tədbirlər görülüb. Tikintinin təhlükəsiz məcrada davam etməsi, əməyin mühafizəsi və təhlükəsizlik texnikasının xüsusi tələblərinə riayət olunmaqla, burada beş növbədə tunel tikintisinin təcrübəli və peşəkar kadrları çalışıb. Görülən tədbirlər sayəsində inşaat işlərinin aparıldığı dövrdə inşaat meydançasında heç bir xoşagəlməz hadisə baş verməyib və bütün çətinliklərə, həmçinin tunelin mürəkkəb konfiqurasiyasına rəğmən, markşeyderlərin dəqiq hesablamaları nəticəsində sağ tunelin tikintisi uğurla başa çatdırılıb və ən yüksək dəqiqliklə mövcud tunelə birləşdirilib. Tunelin tikintisində 1097 çuqun halqadan istifadə olunub.
Onu da əlavə edək ki, “Avtovağzal” stansiyasını “Xocasən” deposu ilə birləşdirəcək sol tunelin inşasında işlər öz axarı ilə gedir. Sol tunelin uzunluğu isə 1182 metrdir. Tunelin 644 metri artıq qazılıb və hazırda inşaat işləri davam etdirilir.
Bölmənin digər xəbərləri
