MİLLİ MƏCLİSDƏ QƏBUL
İyulun 18-də Milli Məclisin sədri Murtuz Ələsgərov Yaponiya xarici işlər nazirnin birinci müavini Suqiura Seyken başda olmaqla “Böyük İpək Yolu” enerji missiyasını qəbul etmişdir.
Nümayəndə heyətini səmimiyyətlə salamlayan Murtuz Ələsgərov onların missiyasını yüksək qiymətləndirdi. O vurğuladı ki, Azərbaycanda Böyük İpək Yolunun bərpasına böyük əhəmiyyət verirlər, çünki bu, xalqlarımızın yaxınlaşmasına və Yaponiya ilə Azərbaycan arasında iqtisadi əməkdaşlığın uğurlu inkişafına kömək edir. Belə bir missiyanın təşkil ediləcəyini Yaponiyanın baş naziri bu ilin aprelində Pekində keçirilmiş konfransda açıqlamışdı.
Milli Məclisin sədri ikitərəfli münasibətlərin uğurlu inkişafından danışaraq dedi ki, qarşılıqlı surətdə faydalı əlaqələrin bünövrəsi 1998-ci ildə Azərbaycan Prezidenti Heydər Əliyevin Yaponiyaya rəsmi səfəri zamanı qoyulmuşdur. Səfər zamanı dövlətimizin başçısı çoxsaylı görüşlər keçirmiş, Yaponiya-Azərbaycan münasibətlərinin möhkəmləndirilməsinə dair danışıqlar aparmışdır. Səfərdən sonra Yaponiyanın “İtoçu”, “Hitaçi” və digər iri şirkətləri müqavilələr bağlamış və Azərbaycan iqtisadiyyatına sərmayə qoymuşlar. Yaponiya şirkətləri “Şimal” DRES-in yenidən qurulmasında fəal iştirak edir, Sumqayıtın iqtisadiyyatına böyük vəsait yönəldirlər. “İtoçu” şirkəti neft layihələrində yaxından iştirak edir, habelə Bakı-Tbilisi-Ceyhan neft kəmərinin tikintisinə qoşulmaq niyyətindədir.
Murtuz Ələsgərov dövlətlərarası münasibətlərin mühüm hissəsi olan parlamentlərarası əlaqələrin möhkəmləndirilməsi məsələsinə toxunaraq dedi ki, ölkələrimizin parlament üzvləri hələlik ancaq beynəlxalq forumlar zamanı təmasda olurlar. O, ümidvar olduğunu bildirdi ki, yaxın gələcəkdə parlament nümayəndə heyətlərinin qarşılıqlı səfərləri olacaq və bu səfərlər zamanı qanun yaradıcılığına və qanunvericiliyə dair təcrübə mübadiləsi aparılacaqdır.
Parlamentin sədri qonaqlara Ermənistan-Azərbaycan, Dağlıq Qarabağ münaqişəsi, bu problemin dincliklə nizama salınmasına dair danışıqlar prosesi barədə ətraflı məlumat verdi. O, münaqişənin həlli məsələsində ölkəmizin mövqeyini şərh edərək vurğuladı ki, bu mövqe beynəlxalq hüququn prinsiplərinə uyğundur. Murtuz Ələsgərov ölkəmizin ədalətli mövqeyini daim dəstəklədiyinə görə Yaponiya hökumətinə minnətdarlığını da ifadə etdi.
Suqiura Seyken səmimi qəbula və Yaponiya hökumətinin yardımına yüksək qiymətə görə təşəkkür edərək bildirdi ki, o, xarici işlər nazirinin birinci müavini olmaqla yanaşı, həm də Yaponiya parlamentinin deputatıdır. Qonaq öz ölkəsinin qanunvericilik orqanının strukturu və fəaliyyəti barədə müfəssəl məlumat verdi.
Suqiura Seyken Böyük İpək Yolunun bərpasının əhəmiyyətindən söz açaraq dedi ki, bu yol sivilizasiyalar arasında körpüdür. Böyük İpək Yolu vasitəsilə Yaponiyaya gətirilmiş Qərb sivilizasiyasının izləri ölkənin qədim şəhərlərində və tarixi abidələrində indi də qalmaqdadır. Bu yolun bərpası mühüm iqtisadi layihələrin həyata keçirilməsinə təkan verəcəkdir. Ona görə də Yaponiya bu işdə fəal iştirak etmək niyyətindədir.
Qonaq Dağlıq Qarabağ üstündə münaqişənin beynəlxalq prinsiplər çərçivəsində tezliklə həll olunmasının zəruriliyini də vurğuladı. O, həmçinin bildirdi ki, Yaponiya hökuməti BMT-nin Qaçqınların İşləri üzrə Ali Komissarlığının xətti ilə Azərbaycan qaçqın-köçkünlərinə yardım göstərməyi davam etdirir.
Söhbət zamanı Murtuz Ələsgərov nümayəndə heyəti üzvlərinin suallarına cavab verdi.
Qəbulda Milli Məclis sədrinin birinci müavini Arif Rəhimzadə, sədrin müavinləri Ziyafət Əsgərov, Gövhər Baxşəliyeva, Yaponiyanın Azərbaycandakı səfiri Fucivara Toşiyuki iştirak edirdilər.
Bölmənin digər xəbərləri
