MİLLİ MƏCLİSİN DEPUTATI, POLİTOLOQ MÜBARİZ QURBANLININ ÇIXIŞI
“Yeni Azərbaycan naminə” ictimai hərəkatın təsis konfransının çox hörmətli iştirakçıları! Xanımlar və cənablar! Biz bu gün çox mühüm bir hərəkatın təsis konfransına toplaşmışıq. Məndən öncə burada çıxış edən natiqlər bu konfransın toplanmasının məqsəd və məramı haqqında öz fikirlərini açıqladılar. Xalqımız çox mühüm bir siyasi kampaniyanın ərəfəsindədir. Oktyabrın 15-də Azərbaycan Respublikasında prezident seçkiləri keçiriləcəkdir. Hamınızın bildiyi kimi, bu gün prezident seçkilərinə müxtəlif siyasi qurumlardan, müxtəlif təşəbbüs qruplarından namizədlər irəli sürülməkdədir. Xalqımızın ümummilli lideri, müstəqil Azərbaycan dövlətinin banisi və qurucusu möhtərəm Heydər Əliyevin namizədliyi Yeni Azərbaycan Partiyasının ikinci qurultayında irəli sürülübdür və iyunun 23-də partiyanın Siyasi Şurası cənab Heydər Əliyevin namizədliyini rəsmən bir daha bəyan edibdir. Ötən müddətdə müxtəlif ictimai-siyasi qurumlar möhtərəm Heydər Əliyevin prezidentliyə namizədliyini müdafiə etdiklərini bildirmişlər. Mən əminəm ki, Azərbaycanda olan bir sıra ictimai-siyasi qurumlar prezident seçkilərinə qədər Heydər Əliyevin namizədliyini irəli sürmələri haqqında öz bəyanatlarını bundan sonra da verəcəklər.Əslində, cənab Heydər Əliyev Azərbaycan xalqının, bütöv Azərbaycanın, Azərbaycan seçicilərinin mütləq əksəriyyətinin namizədidir. Bu bir aksiomadır və hamı bunu dərk etməkdədir. Keçirilən bütün ictimai rəy sorğuları da bu deyilənləri bir daha təsdiq edir.Azərbaycan dövlət müstəqilliyini əldə etdikdən sonra ölkəmizdə bir sıra seçkilər keçirilibdir. 1993-cü ildən bu yana biz prezident, parlament, bələdiyyə seçkiləri keçirmişik və xalqımızın böyük seçki təcrübəsi vardır. Oktyabr ayında prezident seçkilərində iştirak etmək üçün yeni-yeni iddiaçılar ortaya çıxmaqdadır. Təbii ki, bu, demokratiyanın təzahürüdür, məntiqi nəticəsidir. Lakin indi xalq belə bir sual verir: Görəsən bu iddiaçıların müddəaları varmı, onların iddiaları ilə müdəaları üst-üstə düşürmü? Onlar bu xalq üçün nəsə ediblərmi? Təbii olaraq, cavablar məlumdur. Bu iddiaçılar demək olar ki, sadəcə, iddiaçı kimi ortaya çıxmaqdadırlar. Müstəqillik əldə etdikdən sonra Azərbaycanda mübarizə gedir. Əslində, bu mübarizə iki qüvvə arasında gedir. Populistlərlə radikallar bir tərəfdədir, digər tərəfdə isə dövlət qurucularıdır, praqmatiklərdir, realistlərdir. Bir tərəfdə xəyali macəraçı siyasətçilərdir, digər tərəfdə siyasi prosesləri dərindən bilən, ölkənin, dövlətin, millətin qarşısında duran vəzifələri dərk edən və ölkəni irəli aparmağa qadir olan insanlardır. İkinci qəbildən olan insanlar Heydər Əliyev yolu ilə getməkdədirlər, Heydər Əliyev siyasətinin, ideologiyasının daşıyıcılarıdır. Ötən on il ərzində Heydər Əliyev siyasətinin məntiqi nəticəsi bugünkü Azərbaycandır, inkişaf edən, irəliləyən Azərbaycandır. Heydər Əliyevin qurduğu bu yeni, müstəqil Azərbaycanı bundan sonra daha çox qorumağa bizim məqsədimiz, ehtiyacımız, zərurətimiz vardır. Heydər Əliyevin prezidentliyə namizədliyi xalqın, millətin sifarişidir, Azərbaycanın maraqlarının sifarişidir. Ona görə də ictimai-siyasi qurumların belə böyük toplantısında Heydər Əliyev siyasətini müdafiə edən, Heydər Əliyev yolunu təbliğ etməyə hazır olan ictimai-siyasi qurumların dövlətimizin başçısının qurduğu Yeni Azərbaycan naminə bir hərəkat altında birləşməsi təbii ki, zərurətdən doğan bir məsələdir. Mən vaxtın azlığını nəzərə alaraq, bir sıra məqamları daha geniş izah etməyə ehtiyac duymuram. Bunların bir çoxu məlum həqiqətlərdir. Bu məlum həqiqətlər Azərbaycan xalqının Heydər Əliyev yolu ilə inkişafının zəruriliyini bir daha təsdiq edir. Atatürkün gözəl bir sözü var: Milləti, dövləti, xalqı macəraçı siyasətçilərdən qoruyun! Biz bu gün Azərbaycanı səriştəsiz, populist, macəraçı siyasətçilərdən qorumalıyıq. Çünki Azərbaycan üçün ən böyük təhlükələrdən biri, xarici erməni təcavüzünə bərabər təhlükə kimi mən səriştəsizliyi və macəraçı siyasətçiliyi görürəm. Çünki həmin macəraçılıq və səriştəsizlik Azərbaycanı daha böyük fəlakətlərə apara bilər.Ona görə də bizim bu ictimai hərəkat məhz həmin macəraçılara, səriştəsizlərə, populistlərə qarşıdır və burada toplaşan ictimai qurumlar da bu işi, bu missiyanı çox uğurla yerinə yetirəcəkdir. Bu hərəkatın yaranması münasibətilə hamınızı təbrik edirəm. Bu hərəkatımız yolunda sıx birləşməyi və qarşımızda duran vəzifəni yerinə yetirməyi, bu işləri daha uğurla başa çatdırmağı arzulayıram. Əminəm ki, oktyabrın 15-də biz bu qələbəmizi, uğurumuzu birlikdə qeyd edəcəyik. Təşəkkür edirəm.
Bölmənin digər xəbərləri
