İngiltərənin Tetford şəhərində miqrasiya əleyhinə etirazlar davam edir
London, 7 avqust, AZƏRTAC
İngiltərənin Norfolk qraflığının Tetford şəhərində miqrasiya əleyhinə etiraz aksiyaları ilə əlaqədar iğtişaşların üçüncü gecəsində daha 2 nəfər saxlanılıb.
AZƏRTAC BBC-yə istinadla xəbər verir ki, Norfolk polisi təhlükəsizlik məqsədilə sığınacaq axtaran şəxsləri yaşadıqları evlərdən təxliyə edib. Polisin məlumatına görə, yaşı 40-dan yuxarı olan 2 kişi həbs olunub və bununla da, iğtişaşlarla bağlı saxlanılanların ümumi sayı 5-ə çatıb.
Avqustun 4-ü və 5-i axşam etirazçılar sığınacaq axtaranların yaşadıqlarını güman etdikləri evlərə daxil olmağa cəhd göstəriblər, hüquq-mühafizə orqanlarının əməkdaşları ciddi aqressiya ilə üzləşiblər.
Şahidlərin sözlərinə görə, 200-ə yaxın şəxsin iştirak etdiyi aksiya zamanı daş və yumurtalar atılıb, etirazçılar “onlar buradan getsinlər” şüarları səsləndiriblər.
Polis bildirib ki, kişi əməkdaşlardan 1-i daş zərbəsi alıb, qadın polis əməkdaşı isə ciddi xəsarət alıb. Norfolk polisi iğtişaşlarla bağlı araşdırmaların davam etdiyini və ictimai asayişin qorunması üçün əlavə tədbirlərin görüldüyünü açıqlayıb.
Bölmənin digər xəbərləri
