MİLLİ MƏCLİSİN DEPUTATLARI CƏBHƏ XƏTTİNDƏƏSGƏRLƏRLƏ GÖRÜŞMÜŞLƏR
Deputatlar əvvəlcə Bərdə rayonundakı hərbi hissənin həyətində ümummilli lider Heydər Əliyevin abidəsi önünə əklil qoymuş, fəxri qonaqlar kitabına ürək sözlərini yazmışlar.
Hərbi hissənin komandiri qonaqlara burada xidmətin təşkili haqqında ətraflı məlumat vermişdir.
Milli Məclisin deputatları Azərbaycan Silahlı Qüvvələrinin Ağdam ərazisində Ermənistan silahlı qüvvələrinin mövqeləri ilə üzbəüz yerləşən postlarına baş çəkmiş, burada əsgər yataqxanalarına baxmış, düşmən mövqelərini müşahidə etmişlər. Düşmənlə üz-üzə dayanmış əsgərlər və zabitlərlə söhbət edən deputatlar onların qidalanması, yataq şəraiti və digər qayğıları ilə maraqlanmış, bir yerdə nahar etmiş, gətirdikləri sovqatları paylamışlar.
Hərbi anda sadiq qalan, Azərbaycan Respublikasının suverenliyini, müstəqilliyini və ərazi bütövlüyünü əzmlə qoruyan, gecə-gündüz soyuq səngərdə Vətənin keşiyində şərəflə dayanan əsgərlər də deputatlarla söhbət zamanı onları maraqlandıran suallara cavab vermiş, zabit-əsgər münasibətləri, yataqxana geyim və ərzaq təchizatı ilə bağlı heç bir narazılıqlarının olmadığını demişlər.
“N” saylı hərbi hissədə əsgərlər qarşısında çıxış edən deputatlar bildirmişlər ki, gördüklərimiz bizi sevindirdi. Fəxr edirik ki, sizin kimi igid övladlarımız düşmənlə üz-üzə belə qətiyyətlə dayanmışlar. Onlar xatırlatmışlar ki, ordu quruculuğu üçün bu gün ölkədə çox böyük işlər görülür. Xüsusi vurğulanmışdır ki, Silahlı Qüvvələrin Ali baş komandanı, Prezident İlham Əliyev Azərbaycan ordusunun qüdrətlənməsi üçün əlindən gələni edir. Hərbçilərin həyat şəraitinin yaxşılaşdırılması üçün büdcədən böyük məbləğdə vəsait ayrıldığı diqqətə çatdırılmışdır.
Cari ildə ikinci dəfə cəbhə xəttində olduqlarını xatırladan deputat Elmira Axundova Silahlı Qüvvələrimizdə inkişafa doğru böyük dəyişikliklər baş verdiyini əsgər və zabitlərə gözəl şərait yaradıldığını, Ali baş komandan İlham Əliyev başda olmaqla bütün Azərbaycan xalqının onların arxasında durduğunu və qələbə gününün üzaqda olmadığını bildirmiş, müəllifi olduğu bir neçə kitabı əsgər və zabitlərə bağışlamışdır.
Zabit və əsgərlər adından çıxış edən tabur komandiri Abış Abışov göstərilən diqqətə görə təşəkkür etmiş və demişdir ki, səfəriniz şəxsi heyəti çox sevindirir. Ordu hiss edir ki, arxasında onun dayağı var. Silahlı Qüvvələrimiz torpaqlarımızı düşmən tapdağından azad etməyə qadirdir. Biz Ali baş komandanın əmrini yerinə yetirməyə hazırıq.
Bölmənin digər xəbərləri
