Milli Qəhrəman Cavanşir Rəhimovun ailəsi ziyarət olunub
Qax, 15 may, AZƏRTAC
Qax rayonunda “Vətənin məğrur anaları” layihəsi çərçivəsində Azərbaycanın Milli Qəhrəmanı şəhid Cavanşir Rəhimovun ailəsi ziyarət olunub. Görüş Şəki-Zaqatala Regional Gənclər və İdman İdarəsinin Qax rayonu üzrə gənclər və idman sektorunun və Qax rayon Heydər Əliyev Mərkəzinin birgə təşkilatçılığı ilə şəhidin doğulduğu Qaşqaçay kəndində keçirilib.
Bu barədə AZƏRTAC-ın bölgə müxbirinə Qax rayonu üzrə gənclər və idman sektorundan məlumat verilib.
Bildirilib ki, layihənin həyata keçirilməsində əsas məqsəd gənclərdə vətənpərvərlik hissinin gücləndirilməsinə, şəhidlərin qəhrəmanlığının gələcək nəsillərə çatdırılmasına xidmət etmək, onların ailələrinə mənəvi dəstək göstərməkdən ibarətdir.
Görüş zamanı Milli Qəhrəmanın anası Lalə Rəhimova gənclərə övladının keçdiyi şərəfli döyüş yolundan, onun Vətənə olan sonsuz sevgisindən və göstərdiyi qəhrəmanlıqlardan söhbət açıb. Şəhid anası Vətən uğrunda canını qurban verən igid övladı ilə hər zaman qürur duyduğunu bildirib, şəhidlərimizin əziz xatirəsinin xalqımızın qəlbində daim yaşayacağını vurğulayıb.
Xatırladaq ki, Cavanşir Rəhimov Birinci Qarabağ müharibəsində igidliyi ilə tarix yazan qəhrəman oğullardan biridir. O, 1973-cü il iyunun 5-də Qax rayonunun Qaşqaçay kəndində anadan olub. Uşaq yaşlarında olarkən ailəsi Bakının Qaraçuxur qəsəbəsinə köçüb. Suraxanı rayonundakı 104 saylı orta məktəbdə təhsil alıb. 1992-ci ildə hərbi xidmətə çağırılan Cavanşirin taleyinə yenicə yaranmağa başlayan Azərbaycan Hərbi Hava Qüvvələrində xidmət etmək düşüb. O, hərbi vertolyotun bort atıcısı kimi torpaqlarımızın işğaldan azad edilməsi uğrunda gedən döyüşlərdə iştirak edib, sərrast atəşlə düşmənin xeyli canlı qüvvəsini məhv edib. 1992-ci il avqustun 6-da növbəti döyüş tapşırığını yerinə yetirərkən qəhrəmancasına həlak olub.
Azərbaycan Respublikası Prezidentinin 1994-cü il 16 sentyabr tarixli Fərmanı ilə Cavanşir Rəhimova ölümündən sonra “Azərbaycanın Milli Qəhrəmanı” adı verilib.
O, Azərbaycanın ən gənc Milli Qəhrəmanıdır. Bakı şəhərində Şəhidlər xiyabanında dəfn edilib. Suraxanı rayonundakı 146 saylı tam orta məktəb Cavanşir Rəhimovun adını daşıyır. Qaraçuxur qəsəbə parkında onun büstü qoyulub.
Müxbir – Mustafa Dadaşov
Bölmənin digər xəbərləri
