CƏMİYYƏT
MİLLİ QƏHRƏMANLARIN XATİRƏ GECƏSİ
Sentyabrın 30-da Azərbaycan Dövlət İqtisad Universitetində Gənclər, İdman və Turizm Nazirliyi Azərbaycan Respublikası Milli Qəhrəmanlarını Tanıtma İctimai Birliyi ilə birgə “28 şəhid milli qəhrəmanın xatirə gecəsi”ni keçirmişlər.
Əvvəlcə Azərbaycan Respublikasının dövlət himni səsləndi.
Universitetin prorektoru Şaiq Əsgərov çıxış edərək milli qəhrəmanlarımızın xatirəsinin əbədiləşdirilməsinə və onların ailələrinə Prezident Heydər Əliyevin daim böyük qayğı və diqqət göstərdiyini bildirdi. Şəhidlərimizin xatirəsinin heç vaxt unudulmadığını, həmişə əziz tutulduğunu diqqətə çatdırdı.
Milli qəhrəmanları tanıtma ictimai birliyinin sədri Elşən Məmmədov Milli qəhrəmanlarımızın xatirəsi ilə bağlı həyata keçirdikləri tədbirlərdən və onun əhəmiyyətindən söz açdı.
Gecədə 28 şəhid milli qəhrəmanın - Eldar Tağızadə, Malik Əsədov, Rövşən Əliyev, İxtiyar Qasımov və başqalarının keçdiyi həyat və şərəfli döyüş yolları haqqında ətraflı məlumat verildi.
Şəhidlərin ruhu bir dəqiqəlik sükutla yad edildi.
Şəhid ailələri adından çıxış edən Bakı Dövlət Universitetinin prorektoru, fəlsəfə elmləri doktoru, professor İzzət Rüstəmov onlara göstərdiyi qayğı və diqqətə görə Azərbaycan Prezidentinə öz təşəkkürünü bildirdi. Eyni zamanda, ermənilərin torpaqlarımızda törətdikləri vəhşiliklərdən danışaraq, gənclərimizi işğal olunmuş ərazilərimizi Ermənistan Silahlı qüvvələrinin caynağından azad etmək üçün həmişə hazır olmağa çağırdı.
Nizami rayonundakı 1 nömrəli uşaq evində tərbiyə olunan balacalar milli qəhrəmanlara həsr etdikləri kiçik xalçaların foto şəkillərini nümayiş etdirdilər.
Sonra Azərbaycan Silahlı Qüvvələrinin mahnı və rəqs ansamblının ifasında vətən, qəhrəmanlıq, sülh haqqında mahnılar və şerlər səsləndi.