CƏMİYYƏT
MİNGƏCEVİR ŞƏHƏRİNƏ GEDƏN YOL ƏSASLI TƏMİR OLUNUR
Yevlax rayonu ərazisindəki Mingəçevir dəmir yolu stansiyasından Mingəçevir şəhərinə qədər olan 20 kilometr uzunluğunda avtomobil yolunun çəkilməsinə kömək göstərilməsi barədə bir qrup şəhər sakininin Yeni Azərbaycan Partiyası sədrinin birinci müavini, Milli Məclisin deputatı İlham Əliyevə ünvanladığı müraciətə dərhal müsbət münasibət bildirilmişdir.
“Azəravtoyol” Dövlət Şirkətinin balansında olan bu sahədə Milli Məclisin deputatı İlham Əliyevin köməyi ilə geniş yenidənqurma işlərinə başlanmışdır. Qazax-Gəncə-Yevlax magistral avtomobil xətti ilə Balakən-Oğuz bölgəsini birləşdirən bu yolun müasir tələblər səviyyəsində yenidən qurulması oktyabrın sonuna kimi başa çatdırılacaqdır. Yolun Mingəçevirə giriş hissəsində milli arxitektura tərtibatlı “Nur qapısı” abidə-kompleksi ucaldılacaqdır. Respublikamızın cənub-qərb bölgəsinin əhalisi uzun illərdən bəri həllini gözləyən bu problemin aradan qaldırılmasına İlham Əliyevin göstərdiyi qayğı və diqqətdən razı qalmışlar.