MİNGƏÇEVİR MƏŞĞULLUQ MƏRKƏZİ 3118 NƏFƏRİ İŞLƏ TƏMİN ETMİŞDİR
AZƏRTAC xəbər verir ki, ulu öndər Heydər Əliyevinin siyasi kursunun layiqli davamçısı Prezident İlham Əliyev tərəfindən ardcıl surətdə həyata keçirilən tədbirlərin başlıca məqsədi əhalinin rifah halının yüksəldilməsi, yeni iş yerlərinin yaradılması, gənclərin, sosial müdafiəyə ehtiyacı olan vətəndaşların məşğulluğunun təmin edilməsidir.
Mingəçevir Şəhər Məşğulluq Mərkəzindən AZƏRTAC-a bildirmişlər ki, əhalinin işsiz təbəqəsinin məşğulluğunun təmin olunması məqsədilə bütün idarə və təşkilatlarla, istehsal müəssisələri və xidmət obyektləri ilə əlaqə yaradılmış, vakant iş yerləri barədə məlumatların toplanması və iş axtaran vətəndaşların məşğulluğunun təmin edilməsi məqsədilə həyata keçirilən tədbirlər davam etdirilir. Xatırladaq ki, 2003-cü ilin oktyabrından 2008-ci ilin iyulunadək Mingəçevir şəhər Məşğulluq Mərkəzi tərəfindən 5066 nəfər işsiz və iş axtaran vətəndaş qeydiyyata alınmışdır. Onlardan 1788 nəfəri qadın, 2480 nəfəri gəncdir. Müraciət edənlərdən 3118 nəfəri işlə təmin olunmuş, 80 nəfər peşə hazırlığı kurslarına cəlb edilmişdir. Keçirilən əmək yarmarkalarında 442 nəfər müvafiq əmək kollektivlərinə göndəriş almışdır.
Yeri gəlmişkən, Mingəçevir şəhərində növbəti əmək yarmarkası sentyabrın 26-da keçiriləcəkdir.
Bölmənin digər xəbərləri
