Minskdə Zəfər Günü ilə bağlı rəsmi qəbul keçirilib
Kiyev, 7 noyabr, AZƏRTAC
8 Noyabr-Zəfər Günü münasibətilə Minsk şəhərində rəsmi qəbul təşkil edilib.
AZƏRTAC xəbər verir ki, Azərbaycanın Belarusdakı səfirliyi tərəfindən təşkil olunan qəbulda əsas qonaq qismində Belarus Parlamentinin Nümayəndələr Palatasının beynəlxalq məsələlər üzrə daimi komissiyasının sədri Andrey Savinıx, eləcə də Belarusda fəaliyyət göstərən diplomatik korpusun, dövlət qurumlarının, ictimai, mədəni, işgüzar dairələrin, MDB İcraiyyə Komitəsinin nümayəndələri, bir sıra ali təhsil müəssisələrinin təmsilçiləri, diaspora rəhbərləri və üzvləri, KİV nümayəndələri iştirak ediblər.
Azərbaycan və Belarus himnlərinin səsləndirilməsindən sonra səfir Ülvi Baxşəliyev çıxış edərək Ali Baş Komandan İlham Əliyevin rəhbərliyi ilə Azərbaycan Silahlı Qüvvələrinin 44 günlük Vətən müharibəsində əldə etdiyi Qələbənin tariximizə qızıl hərflərlə yazıldığını və hər il 8 noyabr tarixinin ölkəmizdə Zəfər Günü kimi qeyd olunduğunu bildirib. Üç il əvvəl Azərbaycanın BMT Nizamnaməsi ilə hər bir ölkəyə verilən hüquqdan - özünümüdafiə hüququndan istifadə edərək 30 ilə yaxın pozulmuş ərazi bütövlüyünü, cəmi iki ay bundan əvvəl isə ölkənin bütün ərazisi üzərində suverenliyini tamamilə bərpa etdiyini tədbir iştirakçılarının diqqətinə çatdırıb.
Vətən müharibəsində qazanılmış şanlı Qələbənin xalqımızın igid oğullarının qanı və canı bahasına başa gəldiyini qeyd edən səfir, Azərbaycanın müstəqilliyi, suverenliyi və bütövlüyü uğrunda canlarından keçmiş bütün şəhidlərimizin və qəhrəmanlarımızın əziz xatirəsini dərin ehtiramla yad edib.
Daha sonra Ü.Baxşəliyev Ermənistanın ölkəmizə qarşı işğalçılıq və etnik təmizləmə siyasətinə baxmayaraq Azərbaycanın beynəlxalq hüququn, xüsusən də suverenlik, ərazi bütövlüyü və beynəlxalq sərhədlərin toxunulmazlığı prinsiplərinə ciddi əməl olunması əsasında Ermənistanla münasibətləri normallaşdırmaq kursunu götürdüyünü, Ermənistana təqdim etdiyi 5 baza prinsipi əsasında sülh sazişi imzalamağa hazır olduğunu bəyan etdiyini diqqətə çatdırıb. Ölkəmizin Azərbaycan və Ermənistan arasında sülh müqaviləsinin tezliklə bağlanmasında maraqlı olan bütün dövlətlərin səylərini yüksək qiymətləndirdiyini qeyd edərək, o cümlədən Belarus Respublikasının Prezidentinə bu məsələyə ədalətli yanaşmasına görə minnətdarlığını bildirib.
Həmçinin, cari ilin sentyabr ayında həyata keçirilən lokal antiterror tədbirlərinə toxunaraq, Azərbaycan ərazisində yerləşdirilən qeyri-qanuni erməni silahlı birləşmələrinin qalıqlarının tərk-silah edilməsi ilə bağlı rəsmi Bakının dəfələrlə ədalətli tələblərinə baxmayaraq, Ermənistan tərəfinin nəinki bu hərəkətlərdən çəkinmədiyini, Azərbaycan, Rusiya və Ermənistan liderlərinin 2020-ci il noyabrın 10-da imzaladığı üçtərəfli Bəyanatın əksinə olaraq, humanitar yük adı altında Azərbaycan ərazisinə silah, hərbi texnika, sursat, o cümlədən minalar göndərdiyini bildirib.
Səfir Ü.Baxşəliyev hələ antiterror əməliyyatları başlamazdan əvvəl Azərbaycan tərəfindən danışıqların bütün mərhələlərində erməni əsilli Azərbaycan Respublikası vətəndaşlarının bütün hüquq və azadlıqlarını təmin olunacağının bəyan olunduğunu qeyd edərək, əməliyyatlar başa çatdıqdan sonra ermənilərin bir qisminin könüllü olaraq Qarabağ ərazisini tərk etdiyini, bir qisminin isə ölkəmizin vətəndaşlığı üçün müraciət etdiyini diqqətə çatdırıb.
Daha sonra səfir işğaldan azad edilmiş ərazilərin bərpası istiqamətində həyata keçirilən irimiqyaslı layihələrdən danışaraq, bu ərazilərdə enerji təchizatının tam bərpa edildiyini, Qələbədən sonrakı üç il ərzində Qarabağ və Şərqi Zəngəzur iqtisadi rayonlarında tikinti-bərpa işlərinin aparılması üçün dövlət büdcəsindən 7 milyard ABŞ dolları vəsait ayrıldığını bildirib. Bu məqsədlə qəbul edilmiş “Azərbaycan Respublikasının işğaldan azad edilmiş ərazilərinə Böyük Qayıdışa dair I Dövlət Proqramı”nın uğurla həyata keçirildiyini vurğulayıb. Bərpa-quruculuq işləri ilə yanaşı, regionun mühüm tədbirlərə ev sahibliyi etdiyini, Qarabağ İqtisadi Rayonunda “Xarıbülbül” Beynəlxalq Musiqi Festivalı, Vaqif Poeziya Günləri, bir sıra beynəlxalq idman yarışları, Qlobal Media Forumu, Türk Dünyasının I Mədəniyyət Forumu kimi tədbirlərin keçirildiyini diqqətə çatdırıb.
Tədbirdə əsas qonaq qismində iştirak edən Belarus Parlamentinin Nümayəndələr Palatasının beynəlxalq məsələlər üzrə daimi komissiyasının sədri Andrey Savinıx çıxış edərək Zəfər Günü münasibətilə tədbir iştirakçılarını, eləcə də Azərbaycan rəhbərliyini və xalqını təbrik edib. Suverenlik məfhumunun hər bir ölkə üçün nə qədər əhəmiyyətli olduğuna toxunub, Azərbaycanın ərazi bütövlüyünü və suverenliyini bərpa etməsinin ölkənin bundan sonrakı inkişafına daha da təkan verəcəyini qeyd edib. Ölkəmizin bugünkü inkişafının uzun illər ərzində məqsədyönlü olaraq həyata keçirilmiş islahatlara, beynəlxalq platformada layiqli yerini tutmasına səbəb olan uğurlu diplomatiyaya, eləcə də möhkəm təməllər əsasında qurulmuş dövlətçilik ənənələrinə dayandığını vurğulayıb. Məhz bu dövlətçilik ənənələrinə söykənərək daim inkişaf edən Azərbaycana sülh, əmin-amanlıq və firavanlıq arzu edib.
Tədbirin bədii hissəsində Zəfər Günü ilə əlaqədar videoçarx nümayiş olunub və Belarus Dövlət Filarmoniyasının Kvartet qrupunun ifasında Azərbaycan, eləcə də dünya klassiklərinin musiqiləri səsləndirilib.
Kiyev
Bölmənin digər xəbərləri
