Misir portalı Şuşanın tezliklə tam bərpa ediləcəyindən yazıb
Qahirə, 28 yanvar, AZƏRTAC
Misirin “Aldiplomasy” informasiya portalı Şuşanın tezliklə tam bərpa ediləcəyi ilə bağlı xəbər yayıb.
AZƏRTAC-a istinadla yayılan xəbərdə qeyd olunub ki, Prezident İlham Əliyev Şuşa rayonuna təyin edilmiş xüsusi nümayəndəsini qəbul edərkən söyləyib: “Müharibə dövründə, sadəcə olaraq, bir dəfə Şuşa haqqında demişdim, o da müxbir soruşdu ki, bəs Şuşa nə vaxt alınacaq? Əlbəttə ki, bunu biz deyə bilməzdik, dedim ki, Şuşasız bizim qələbəmiz yarımçıq olacaq. Ancaq heç şübhə etmirdim ki, biz əziz, doğma Şuşamızı erməni əsirliyindən xilas edəcəyik, Azərbaycan bayrağını qaldıracağıq. O vaxt demişdim ki, Azərbaycan bayrağı Şuşada qaldırılacaq. Bu gün isə deyirəm ki, biz hamımız, bütün xalqımız Şuşanı dirçəldəcəyik!”.
Xəbərdə bildirilib ki, Prezident İlham Əliyev işğaldan azad edilmiş Şuşa şəhərində xüsusi nümayəndəsi olacaq Aydın Kərimova qədim şəhərin bərpasının daim öz nəzarətində olacağını və yaxın zamanlarda Şuşanın yenə də öz tarixi simasını bərpa edəcəyini deyib.
Oqtay Bayramov
AZƏRTAC-ın xüsusi müxbiri
Qahirə
Bölmənin digər xəbərləri
