Misirdə yaşayan soydaşlarımız Həmrəylik Günü ilə bağlı tədbirdə bir araya gəliblər
Qahirə, 29 dekabr, AZƏRTAC
Dünya Azərbaycanlılarının Həmrəyliyi Günü və Yeni il ölkəmizin Misirdəki səfirliyində də qeyd edilib.
Səfir Şahin Abdullayev Azərbaycan Prezidenti İlham Əliyevin Həmrəylik Günü münasibətilə dünya azərbaycanlılarına ünvanladığı təbrikin mətnini qonaqların diqqətinə çatdırıb.
Azərbaycanda 2014-cü ildə görülmüş işlər barədə məlumat verən diplomat bir sıra uğurlu layihələrin həyata keçirildiyini söyləyib. Ş.Abdullayev 2015-ci ildə Azərbaycanda keçiriləcək ilk Avropa Oyunlarından söhbət açaraq, bu oyunların ölkəmiz üçün xüsusi əhəmiyyət kəsb etdiyini vurğulayıb. O, idmanın və Olimpiya hərəkatının ölkəmizin siyasətinin mühüm bir hissəsi olduğunu söyləyib.
Səfir ümummilli lider Heydər Əliyevin müəyyən etdiyi siyasi kursun Prezident İlham Əliyev tərəfindən uğurla davam etdirildiyini vurğulayıb, Azərbaycanda 2014-cü ildə “Cənub” qaz dəhlizinin təməlinin qoyulduğunu xatırladıb. Diplomat bu layihənin Azərbaycanın beynəlxalq miqyasda rolunu daha da gücləndirməsinin əyani göstəricisi olduğunu diqqətə çatdırıb.
Asya Hacızadə
AZƏRTAC-ın xüsusi müxbiri
Qahirə
Bölmənin digər xəbərləri
