Missuri Universitetinin professoru Respublika Seysmoloji Xidmət Mərkəzində olub
Bakı, 15 sentyabr, AZƏRTAC
Azərbaycanda səfərdə olan ABŞ-ın Missuri Universitetinin professoru Erik Sandvol sentyabrın 15-də Azərbaycan Milli Elmlər Akademiyası (AMEA) nəzdində Respublika Seysmoloji Xidmət Mərkəzinin (RSXM) Monitorinq Mərkəzində olub.
RSXM-in baş direktoru, AMEA-nın müxbir üzvü, professor Qurban Yetirmişli ilə keçirilən müzakirələrdə mərkəzin zəlzələ ocaqlarının dinamikası şöbəsinin müdiri, geologiya-mineralogiya üzrə fəlsəfə doktoru, dosent Səbinə Kazımova da iştirak edib.
Mərkəzin informasiya şöbəsindən AZƏRTAC-a bildiriblər ki, görüşdə 2017-ci ildən bəri ölkəmizdə Respublika Seysmoloji Xidmət Mərkəzi, ABŞ-ın Missuri Universiteti və Ukrayna Elm və Texnologiya Mərkəzinin iştirakı ilə birgə həyata keçirilən “Qafqaz kəsilişi” layihəsi üzrə işlərin gedişatı, eləcə də layihə çərçivəsində quraşdırılmış müvəqqəti stansiyaların fəaliyyəti və əldə olunmuş məlumatların yüksək texnologiyalı proqramlar vasitəsilə emalına dair məsələlər müzakirə olunub.
Erik Sandvol, həmçinin məlumatların emalı və Azərbaycan ərazisində seysmotomoqrafiya işlərinin aparılmasına dair mərkəzin zəlzələ ocaqlarının dinamikası şöbəsi tərəfindən görülmüş işlərlə tanış olub, əldə olunmuş məlumatların emalına dair mərkəz əməkdaşları üçün təlim keçib.
Bölmənin digər xəbərləri
