MOLDOVA ORDUNU YENİDƏN İXTİSAR ETMƏYƏ BAŞLAMIŞDIR
AZƏRTAC xəbər verir ki, Moldova ikinci hərbi islahata müvafiq olaraq, öz ordusunu yenidən ixtisar etməyə başlamışdır. Bunu respublikanın müdafiə naziri Vitali Vrabiye sentyabrın 3-də qeyd olunan milli ordu gününə həsr edilmiş mətbuat konfransında bildirmişdir.
Nazir demişdir ki, ordu 6800 nəfərdən 6500 nəfərə qədər ixtisar olunacaqdır. İlk növbədə, nazirlik aparatının özü ixtisar olunacaqdır. Nazirliklə Baş qərargah arasında səlahiyyətlər yenidən bölüşdürüləcəkdir. Döyüş hissələri də islahata məruz qalacaqdır. Artilleriya briqadası diviziona, zenit-raket briqadası isə polka çevriləcəkdir.
Bu, Moldova ordusunda artıq ikinci ixtisarıdır. 2004-cü ildə birinci ixtisarın gedişində hərbçilərin sayı 7200 nəfərdən 6800 nəfərədək azaldılmışdı. Hazırda orduda hər zabitə 4 əsgər düşür. Onun silahları 6 ədəd Miq-29 qırıcı təyyarəsindən, 15 nəqliyyat təyyarəsindən və vertolyotdan, 209 zirehli transportyordan, 150 top və minomyotdan ibarətdir. Sovet ordusundan qalan silahların çox hissəsi köhnəlmişdir və təmirə ehtiyacı vardır.
Vrabiye demişdir: “Bugünkü reallıqlar nəzərə alınmaqla silahlı qüvvələrin optimallaşdırılması qarşıya qoyulmuş vəzifələri respublika hökuməti tərəfindən ayrılmış vəsait hesabına da tam həcmdə yerinə yetirməyə imkan verəcəkdir”.
Bölmənin digər xəbərləri
