Moldovada Azərbaycanın Zəfər Günü qeyd edilib
Bakı, 8 noyabr, AZƏRTAC
Noyabrın 8-də ölkəmizin Moldovadakı səfirliyinin önündəki “Qələbə” bağçasında Azərbaycanın Zəfər Günü qeyd edilib.
Səfirlikdən AZƏRTAC-a bildirilib ki, “Qələbə” bağçasında XVIII əsrin məşhur Azərbaycan şairi və ictimai xadim, Qarabağ xanının vəziri Molla Pənah Vaqifin barelyefinin açılışı olub.
Açılış mərasimində çıxış edən səfir Qüdsi Osmanov əvvəlcə xalqımıza bu Qələbəni bəxş edən, Azərbaycanın ərazi bütövlüyü və suverenliyi yolunda canlarından keçən şəhidlərimizin əziz xatirəsini yad edib. Səfir bu gün Xankəndidə keçirilən hərbi paradı qeyd edərək, xalqımızın qürur mənbəyi olan Qələbəni tarixi ədalətin bərpası və beynəlxalq hüququn təntənəsi adlandırıb. Diplomat Ermənistanın ölkəmizə qarşı destruktiv və işğalçılıq siyasətinə baxmayaraq, Azərbaycanın sülh gündəliyinə sadiq olduğunu bildirib. Həmçinin səfir işğaldan azad olan ərazilərdə aparılan genişmiqyaslı tikinti-bərpa, yenidənqurma işlərindən danışıb, “Böyük qayıdış” proqramı çərçivəsində bu torpaqların əsl sahibləri olan keçmiş məcburi köçkünlərin doğma yurdlarına qayıtdığını bildirib.
Moldova parlamentinin sədr müavini Mixail Popşoy Azərbaycan xalqını böyük bayram münasibətilə təbrik edərək, ölkəsinin hər zaman Azərbaycanın ərazi bütövlüyünü, suverenliyini dəstəklədiyini və bunun qarşılıqlı olduğunu bildirib. O, yaxın gələcəkdə Dnestryanı münaqişəsinin sülh yolu ilə həll olacağına ümid ifadə edərək, bunun regionun inkişafına töhfə verəcəyini bildirib. Moldova rəsmisi, həmçinin ölkələrimiz arasında inkişaf edən dostluq və əməkdaşlıq münasibətlərindən söz açıb, Moldovada fəaliyyət göstərən Azərbaycan diaspor təşkilatının nümunəvi və aktiv fəaliyyətini vurğulayıb.
Qardaş Türkiyə Respublikasının səfiri Uyqar Mustafa Sertel çıxışında 44 günlük müharibə nəticəsində qazanılan Qələbəni bütün Türk dünyasının Qələbəsi adlandırıb. O, eyni soy-kökə, dilə, dinə, mədəniyyətə və tarixi bağlara malik olan xalqlarımızın sevincli, kədərli günlərdə hər zaman bir-birinin yanında olduğunu dilə gətirib.
Moldovada tanınmış siyasi analitik Vitaliy Andreevskiy çıxışında Azərbaycanın Qələbəsini tarixi hadisə adlandıraraq, əldə edilən Zəfərin güclü lider və xalqın birliyi tandemi əsasında qazanıldığını vurğulayıb.
Daha sonra Moldovanın Millətlərarası Münasibətlər Agentliyinin sədri Nikolay Reditse, Moldova Azərbaycan Konqresinin sədri Elçin Bayramov, siyasi ekspert Ruslan Şevçenko, diasporun fəal üzvü Maarif Rəhimov və milli diasporlar təşkilatlarının rəhbərləri çıxış ediblər.
Tədbirin sonunda qonaqlara Azərbaycan mətbəxinin ləziz təamları təqdim edilib.
Həmçinin Zəfər Günü ilə bağlı səfirlikdə təşkil olunmuş sərgi qonaqlar tərəfindən maraqla qarşılanıb.
Bölmənin digər xəbərləri
