MONİTORİNQ ZAMANI GÖTÜRÜLMÜŞ NÜMUNƏLƏRİN HEÇ BİRİNDƏ QUŞ QRİPİ DAŞIYICISINA TƏSADÜF EDİLMƏMİŞDİR
Dövlət Baytarlıq Xidmətinin mətbuat mərkəzindən AZƏRTAC-a bildirmişlər ki, quş qripi ilə bağlı sentyabrın 24-dən başlanmış monitorinq zamanı seçmə üsulla ovlanmış 26 çöl quşunun patoloji nümunəsinin, 727 baş ev quşundan götürülmüş qan nümunələrinin müayinəsi oktyabrın 6-da başa çatmışdır.
Nümunələrin heç birində quş qripi xəstələyinin daşıyıcısına təsadüf edilməmişdir. Bundan əlavə, monitorinq keçirilən ərazilərdə xəstə və xəstəlikdən tələf olmuş quş müəyyənləşdirilməmişdir.
Oktyabrın 22-də növbəti, bu ilin sayca onuncu monitorinqinə start veriləcəkdir.
Xatırladaq ki, sərhədlərdə baytarlıq nəzarəti məntəqələri ciddi iş rejimində fəaliyyət göstərir, rayonların baytarlıq idarələri kifayət qədər dezinfeksiyaedici maddələrlə təmin edilmişdir, xəstəlik qeyd olunan ölkələrdən diri quş, quş məhsulları, yem və yem əlavələrinin gətirilməsinə, habelə köçəri quşların ovlanmasına qoyulmuş qadağa qüvvədə qalır.
Bölmənin digər xəbərləri
