Moskvada Azərbaycan Turizm Bürosunun nümayəndəliyi açılacaq
Moskva, 23 may, AZƏRTAC
Moskvada Rusiyanın iqtisadi inkişaf naziri Maksim Reşetnikovla Azərbaycanın Dövlət Turizm Agentliyinin sədri Fuad Nağıyev arasında görüş keçirilib.
Bu barədə AZƏRTAC Rusiyanın İqtisadi İnkişaf Nazirliyinin mətbuat xidmətinə istinadla xəbər verir.
Tərəflər xizək turizmi və Xəzər dənizində turizm sahəsində əməkdaşlıq məsələlərini, eləcə də iki ölkənin turizm sənayesi üçün kadrların hazırlanması üzrə ixtisaslaşmış ali təhsil müəssisələri arasında qarşılıqlı fəaliyyət məsələlərini müzakirə ediblər.
"Rusiya və Azərbaycan universitetləri arasında əməkdaşlıq sahəsində müvafiq istiqamətlər turizm təhsilinə ikili diplomların tətbiqi, ölkələrimizin təcrübəsi nəzərə alınmaqla xidmət və təhsil standartlarının işlənib hazırlanması ola bilər", - deyə Maksim Reşetnikov əlavə edib: “Bu istiqamətlərin inkişafı üçün ixtisaslaşmış universitetlərdən birinin bazasında Azərbaycan-Rusiya turizm mərkəzinin yaradılması ola bilər”.
Görüş iştirakçıları, həmçinin Moskvada Azərbaycan Turizm Bürosunun nümayəndəliyinin rəsmi açılış tarixini də müzakirə ediblər. Azərbaycan nümayəndə heyəti turizm bürosu layihəsinin imkanlarını və funksional imkanlarını təqdim edib.
“Moskvanın tam mərkəzində Azərbaycan Turizm Bürosunun nümayəndəliyinin açılması ölkələrimiz arasında daha sıx və intensiv əməkdaşlıq əlaqələri qurmağa imkan verəcək. Ölkələrimizin turizmin inkişafı ilə bağlı çoxlu müştərək planlar, layihələri var və biz şadıq ki, bu intensiv iş ildən-ilə daha da sürətlənir”, - deyə Fuad Nağıyev qeyd edib.
“Azərbaycan müsəlman ölkələrindən turistlərin qəbul edilməsi üçün ən populyar ölkələrdən biridir. Rusiya bu bazarda maraqlıdır. İndi biz federal səviyyədə “Halal” və “Muslim friendly” standartların tətbiqi üzərində işləyirik. Rusiya biznesi Rusiya-Azərbaycan əlaqələrinin möhkəmləndirilməsinə və intensivləşməsinə həvəslə cavab verib. Nəticə olaraq, 2024-cü ilin birinci rübündə ötən illə müqayisədə turist axını demək olar ki, 40 faiz artıb”, - deyə rusiyalı nazir vurğulayıb.
Fəridə Abdullayeva
AZƏRTAC-ın xüsusi müxbiri
Moskva
Bölmənin digər xəbərləri
