DÜNYA
MOSKVADA RUSİYA-AZƏRBAYCAN MÜNASİBƏTLƏRİNİN PERSPEKTİVLƏRİNƏ DAİR KONFRANS KEÇİRİLƏCƏK
Aprelin 22-də Moskvada keçiriləcək elmi-praktik konfransda Rusiya-Azərbaycan münasibətlərinin imkanlarını və perspektivləri müzakirə olunacaqdır. Ümumrusiya Azərbaycan Konqresində (ÜAK) İTAR-TASS-ın müxbirinə bu barədə məlumat verərək bildirmişlər ki, forumun təşkilatçıları ÜAK və Rusiya Federasiyasının Prezidenti yanında Rusiya Dövlət Qulluğu Akademiyasıdır.
ÜAK-ın prezidenti Məmməd Əliyev İTAR-TASS-ın müxbirinə demişdir: “Rusiya ilə Azərbaycan arasında münasibətlərdə son on ildə - 1990-ci illərin əvvəllərindəki tənəzzüldən strateji tərəfdaşlığadək müxtəlif dəyişikliklər baş vermişdir. İndi Azərbaycan və Rusiya dövlətlərarası əlaqələri bütün istiqamətlərdə inkişaf etdirən dost ölkələrdir. Rusiya ilə Azərbaycan arasında intensiv mədəni mübadilə gedir. Azərbaycanlıların dünyada ən böyük diasporlarından biri Rusiyada yaşayır və həmvətənlərimiz Rusiya cəmiyyətinin bütün təbəqələrində təmsil olunmuşlar. Azərbaycanda da böyük rus diasporu var və burada rusdilli əhaliyə münasibət çox yaxşıdır.
Tanınmış Rusiya və Azərbaycan alimləri, politoloq və diplomatları, ictimai xadimləri ötən onillik dövrə qiymət verəcək, Rusiya-Azərbaycan münasibətlərinin daha da inkişaf etdirilməsi yollarını müəyyənləşdirəcəklər.