MÜHARİBƏ VƏ ƏMƏK ƏLİLLƏRİNƏ DİQQƏT VƏ QAYĞI
Oktyabrın 1-i bütün dünyada Beynəlxalq Ahıllar Günü kimi qeyd edilir. Bununla əlaqədar, Bilgəh qəsəbəsindəki müharibə və əmək əlillərinin yaşadığı pansionatda bayram görüşü olmuşdur. Görüşdə əmək və əhalinin sosial müdafiəsi naziri Əli Nağıyev, BMT-nin İnkişaf Proqramı (BMTİP) Bakı nümayəndəliyi başçısının müavini Devid Eyzenberq, Xəzər Dəniz Gəmiçiliyi İdarəsinin və Sabunçu rayonu icra hakimiyyətinin rəhbərləri iştirak etmişlər.
Əmək və əhalinin sosial müdafiəsi naziri Əli Nağıyev görüşdə çıxış edərək, pansionatda yaşayanları bayram münasibətilə səmimi qəlbdən təbrik etmiş, onlara möhkəm cansağlığı və uzun ömür arzulamışdır. Nazir vurğulamışdır ki, ölkəmizdə həyata keçirilən iqtisadi islahatlar və dəyişikliklər, daxili ümumi məhsulun, iqtisadiyyatımıza investisiyaların və kapital qoyuluşunun artımı sosial sahənin inkişafına müsbət təsir göstərir. 1996-cı ildən 2002-ci ilədək olan dövr ərzində pensiyalar 2,7 dəfə artırılmışdır və ölkəmizin iqtisadiyyatı nə qədər güclü olarsa, pensiya və sosial təminatlar da bir o qədər yüksək olacaqdır.
Əli Nağıyev demişdir ki, dövlət ahıl insanlara, müharibə və əmək veteranlarına bundan sonra da diqqət və qayğı göstərəcəkdir. O, görüşdə iştirak edən veteranları bayram münasibətilə bir daha təbrik etmiş, nazirlik adından onlara soyuducu, televizor, videomaqnitofon və dərman preparatları bağışlamışdır.
Sabunçu rayonu icra hakimiyyəti və BMTİP-in Bakı nümayəndəliyinin rəhbərləri də pansionat sakinlərinə hədiyyələr təqdim etmişlər.
Bölmənin digər xəbərləri
