MÜSABİQƏNİN QALİBİ İLƏ SƏHMLƏRİN ALQI-SATQI MÜQAVİLƏSİ İMZALANMIŞDIR
Xəbər verildiyi kimi, “Kimya sənayesi müəssisələrinin və təşkilatlarının özəlləşdirilməsi haqqında” Azərbaycan Respublikası Prezidentinin 22 mart 2001-ci il tarixli Sərəncamının icrasını təmin etmək məqsədi ilə İqtisadi İnkişaf Nazirliyinin Dövlət əmlakının özəlləşdirilməsi departamentinin “Bakı Rezin Məmulatları” Açıq Səhmdar Cəmiyyəti səhmlərinin satışı üzrə keçirdiyi investisiya müsabiqəsində “Elvin-F” Məhdud Məsuliyyətli Cəmiyyəti qalib gəlmişdir.
Nazirliyin mətbuat xidmətindən AZƏRTAC-a daxil olmuş məlumatda bildirilir ki, iyulun 15-də Dövlət əmlakının özəlləşdirilməsi departamenti və “Elvin-F” MMC arasında “Bakı Rezin Məmulatları” Açıq Səhmdar Cəmiyyətinin investisiya müsabiqəsində satılmış səhmlərinin alqı-satqı müqaviləsi imzalanmışdır.
Müqaviləyə əsasən, “Elvin-F” MMC dövlət büdcəsinə 180 milyon manat köçürməli və 10 min ədəd dövlət özəlləşdirmə çekini Dövlət əmlakının özəlləşdirilməsi departamentinə təqdim etməlidir.
Müsabiqə qalibinin təqdim etdiyi investisiya proqramına əsasən, “Bakı Rezin Məmulatları” ASC-də bina, qurğu və mühəndis kommunikasiyalarının təmiri, yeni avadanlığın alınması və digər işlərə növbəti 18 ay ərzində 850 milyon manat həcmində investisiya qoyuluşu planlaşdırılır.
İnvestisiya proqramında SC-nin fəaliyyəti tamamilə bərpa olunduqdan sonra müəssisədə iş yerlərinin sayının 85-ə çatdırılması, işçilərin orta aylıq əmək haqqının iki dəfə artırılması da nəzərdə tutulur.
Bölmənin digər xəbərləri
