Mütəxəssis: Koronavirusa yoluxma sayındakı cüzi artımlar təbiidir
Bakı, 21 sentyabr, AZƏRTAC
“Omikron” ştamının alt növü EG.5 öz sələflərindən yoluxuculuq qabiliyyətinin daha üstün olması ilə fərqlənir. Azərbaycanda virusun həmin variantı rəsmi olaraq aşkarlanmayıb.
Bunu AZƏRTAC-a Səhiyyə Nazirliyinin mütəxəssis-eksperti, infeksionist Təyyar Eyvazov deyib. O qeyd edib ki, hazırda ölkəmizdə də koronavirusa yoluxma sayındakı cüzi artımlar təbiidir.
“COVID-19-un yoluxma sayında artım insanların məzuniyyətdən işə qayıtması, tədrisin başlanması, ən əsası isə havaların tədricən soyuması, insanların daha çox qapalı məkanlarda toplanması və yaxın təmasların artması ilə əlaqədardır. Payız və qış aylarına doğru yoluxma sayında olacaq artımlar gözlənilən haldır. Əslində isə, əhalinin əksəriyyətinin xəstəliyin yüngül keçməsi ilə əlaqədar həkimə müraciət etməməsi nəticəsində statistik rəqəmlər real rəqəmlərdən daha azdır. Ümumiyyətlə, düşünürəm ki, əhalinin pandemiya dövründə qazandığı təcrübə, özünüqoruma qaydalarına əməl etməsi, risk qrupuna daxil olan şəxslərin vaksinasiyasına yönəlmiş maarifləndirmə işləri baş verə biləcək yeni artımların öhdəsindən asanlıqla gələ biləcəyimizi proqnozlaşdırmağa əsas verir”, - deyə mütəxəssis bildirib.
Bölmənin digər xəbərləri
