Bakı, 1 avqust, AZƏRTAC

Bu gün dünya siyasətçilərinin ən çox müzakirə etdiyi mövzulardan biri də Soros fondunun “rəngli inqilablar”ın həyata keçirilməsinə maraqlı olması, bu məqsədlə külli miqdarda maliyyə vəsaitini xərcləməsidir.

AZƏRTAC xəbər verir ki, bunu Milli Məclisin deputatı Naqif Həmzəyev bildirib.

Millət vəkili qeyd edib ki, xaosların yaradılması, onların idarə edilməsi strategiyası üzrə peşəkarlaşan Soros fondunun təsisçisi Corc Soros dünyanın bir çox ölkəsində baş verən təxribatların mərkəzində dayanan ən təhlükəli insan kimi tanınır. Serbiyada, Gürcüstanda, Ukraynada baş verən hadisələrin, 2018-ci ildə küçə yürüşləri, qanunsuz mitinqlər, kütləvi aksiyalar təşkil etməklə inqilab yolu ilə Nikol Paşinyanın Ermənistanda hakimiyyətə gəlməsinin əsas dəstəkçisinin Soros fondunun olduğu hər kəsə bəllidir.

Ölkə Prezidenti İlham Əliyev Balakən regional “ASAN xidmət” mərkəzi ilə tanışlıqdan sonra ASAN könüllüləri ilə görüşündə Ermənistanın bugünkü rəhbərliyinin də Soros fondunun təsiri altında olan adamlardan ibarət olduğuna diqqət çəkib.

Azərbaycanın ərazi bütövlüyünə göz tikən Ermənistanın Tovuz istiqamətində təcavüzkar niyyəti Silahlı Qüvvələrimiz tərəfindən puç olduqdan sonra Ermənistan üzv olduğu Kollektiv Təhlükəsizlik Müqavilə Təşkilatına üz tutdu. İşğalçı siyasətinə dəstək ala bilməyən Ermənistan, dövlətimizin başçısının qeyd etdiyi kimi Sorosun tör-töküntüləri KTMT-nin müttəfiqləri ola bilməz: “Ona görə indi Ermənistan elə vəziyyətdədir ki, özünü itirib, səhv addımlar atır. Sərhəddəki təxribat hesab edirəm ki, onlar tərəfindən bir sınama cəhdi idi ki, baxsınlar, görsünlər buna kim nə reaksiya verəcək. Gördülər ki, onların müttəfiq saydıqları bütün ölkələr ya bizi dəstəklədilər, ya da neytral qaldılar. Gördülər ki, Azərbaycanın beynəlxalq dəstəyi nə qədər güclüdür. Ona görə bu, onlar üçün dərs olmalıdır”.

Ermənistan hakimiyyəti bir daha Azərbaycanın beynəlxalq nüfuzunun onlardan qat-qat yüksək olduğunu, KTMT-yə üzv beynəlxalq təşkilatların çoxunun ölkəmizin mövqeyini dəstəklədiyini dərk etdi. Ermənistan hakimiyyəti artıq anlamalıdır ki, təcavüzkar siyasətini davam etdirərsə, ölkələrinin müstəqilliyindən danışmaq bir müddət sonra mümkün olmayacaq. Çünki regionun əsas aparıcı gücü, dövləti Azərbaycandır. Regionda bütün beynəlxalq tədbirlər Azərbaycanın iradəsi ilə, məhz Azərbaycanın istəyi ilə həyata keçirilir. Ermənistanın Tovuz istiqamətindəki təxribatı bir daha göstərdi ki, əksər təşkilatlar Azərbaycanı dəstəkləyir. İlk olaraq qardaş Türkiyə rəsmi olaraq Azərbaycanın ərazi bütövlüyünü dəstəklədiyini, ərazi bütövlüyünün bərpası üçün əlindən gələni edəcəyini bəyan etdi. Daha sonra müxtəlif beynəlxalq təşkilatlar, Qoşulmama Hərəkatı, Türkdilli Dövlətlərin Təhlükəsizlik Şurası, ABŞ Senatı da ilk dəfə olaraq Azərbaycanın ərazilərinin işğal olduğunu rəsmi tanıdı. Ümumilikdə isə biz açıq-aşkar bəyan edirik ki, heç bir beynəlxalq güclərin təsiri altında deyilik, biz hansısa havadarların çaldığı mahnıları ifa etmirik. Biz yalnız Azərbaycan xalqının inkişafını, Azərbaycan dövlətinin güclənməsini və torpaqlarımızın işğaldan azad olmasını istəyirik. Ermənistan hökumətindən tək tələbimiz işğalçı caynaqlarını ölkəmizdən çəkməsidir.