CƏMİYYƏT
NARKOMANLIĞA VƏ NARKOTİK VASİTƏLƏRİN QANUNSUZ DÖVRİYYƏSİNƏ QARŞI MÜBARİZƏ DAVAM EDİR
Narkomanlığa və Narkotik Vasitələrin Qanunsuz Dövriyyəsinə Qarşı Mübarizə üzrə Dövlət Komissiyasından AZƏRTAC-a daxil olmuş məlumatda bildirilir ki, 2002-ci ilin beş ayı ərzində respublikanın ərazisində narkotiklərlə bağlı 1019 cinayət faktı qeydə alınmışdır.
Həmin müddətdə ayrı-ayrı şəxslərdən 29 kiloqram 281,35 qram narkotik vasitələr, psixotrop maddələr və prekursorlar, o cümlədən 1 kiloqram 394 qram heroin, 3 kiloqram 188 qram tiryək, 3 kiloqram 518 qram həşiş, 21 kiloqram 177 qram marixuana, 4,35 qram sirkə anhidridi götürülmüşdür.
Hüquq mühafizə orqanları əsas diqqəti narkotik vasitələrin, psixotrop maddələrin və prekursorların qanunsuz dövriyyəsi, daxilolma mənbələri və kanallarının aşkar edilməsinə yönəltmişlər ki, bu da öz müsbət nəticələrini verir. Ötən beş ayda satışla bağlı 325 cinayət faktı qeydə alınmışdır və bu, keçən ilin müvafiq dövründəkindən 26 fakt çoxdur.
Təhlil dövründə bu növ cinayət törətdiklərinə görə 12 nəfər xarici vətəndaş yaxalanaraq cinayət məsuliyyətinə cəlb edilmiş, onlardan 530 qram müxtəlif narkotik vasitələr götürülmüşdür. Yaxalanmış əcnəbilərin 5-i İran, 3-ü Gürcüstan, 2-si Rusiya, 1-i Ukrayna və 1 nəfəri Əlcəzair vətəndaşıdır.