Naxçıvan Azərbaycanın enerji strategiyasının mühüm tərkib hissələrindən biri olacaq – RƏY
Bakı, 13 avqust, AZƏRTAC
Prezident İlham Əliyevin və birinci xanım Mehriban Əliyevanın avqustun 11-də Naxçıvana səfəri çərçivəsində olduqca mühüm obyektlərin açılışlarında və təməlqoyma mərasimlərində iştirak etmələri muxtar respublikanın sosial-iqtisadi inkişafının hər zaman dövlətimizin diqqət mərkəzində olmasının bariz nümunəsidir. Naxçıvanda həyata keçirilən irimiqyaslı layihələr, eləcə də bu istiqamətdə işlərin davam etdirilməsinin nəzərdə tutulması muxtar respublikanın iqtisadi inkişafını sürətləndirəcək, naxçıvanlıların sosial rifahının yüksəldilməsinə böyük təkan verəcək.
Bu sözləri AZƏRTAC-a açıqlamasında Bakı Dövlət Universitetinin kafedra müdiri, professor Kamilə Əliyeva bildirib.
O bildirib ki, Prezident İlham Əliyev səfər çərçivəsində Azərbaycan Televiziyasına müsahibəsində verdiyi açıqlamalarda Naxçıvanın təkcə ölkəmizin deyil, bütövlükdə regionun mühüm nəqliyyat mərkəzlərindən birinə çevriləcəyini xüsusi vurğuladı. Naxçıvanın coğrafi baxımdan Azərbaycanın əsas hissəsi ilə quru əlaqəsinin olmaması muxtar respublikanın təhlükəsizliyini xüsusi olaraq ön plana çıxarır. Prezidentin Əlahiddə Ümumqoşun Ordusunun yaradılmasını, yeni komando qüvvələrinin formalaşdırılmasını və ən müasir hərbi texnika ilə təmin edilməsini xüsusi vurğulaması göstərir ki, Naxçıvanın müdafiə qabiliyyətinin gücləndirilməsi dövlətin strategiyasının fundamental istiqamətlərindən biri olaraq qalır. Prezident İlham Əliyev Naxçıvanın hərbi təhlükəsizliyi ilə yanaşı, enerji təhlükəsizliyinin də təmin edilməsini vacib amil kimi xüsusi vurğuladı. Muxtar respublikada Sənaye Parkının yaradılması və onun tərkibində 300 meqavat gücündə İstilik Elektrik Stansiyasının inşası barədə qərar bu baxımdan çox önəmli addımdır.
Kamilə Əliyeva qeyd edib ki, Naxçıvanda bərpaolunan enerji sahəsində də böyük layihələr reallaşdırılıb. Belə ki, inşa edilmiş Günəş elektrik stansiyasının gücünün ən azı 500 meqavata, gələcəkdə isə 1000 meqavata çatdırılması muxtar respublikanın yaşıl enerji siyasətinin uzunmüddətli və dayanıqlı xarakter daşıdığını göstərir. Eyni zamanda, bu, Naxçıvanın enerji ixracı imkanlarını da genişləndirir. Yaxın zamanda Naxçıvanın qonşu ölkələrə enerji ixrac etməsi mühüm hadisə olacaq. Azərbaycan dünyada neft və qaz ixrac edən ölkə kimi tanınır. Çox yaxın zamanda ölkəmizin Avrasiya məkanında yaşıl enerji ixrac edən ölkə kimi mühüm dövlətlərdən birinə çevrilməsi də real perspektivdir. Bu məsələdə sözsüz ki, Naxçıvan Azərbaycanın enerji strategiyasının mühüm tərkib hissələrindən biri olacaq.
“Şərqlə Qərbi birləşdirən Orta Dəhlizin mühüm hissələrindən biri olan Zəngəzur dəhlizi də məhz Naxçıvanla bağlı mühüm nəqliyyat perspektivləri yaradır. Bu dəhliz Avropa ilə Asiyanı birləşdirən, iqtisadi baxımdan böyük əhəmiyyətə malik nəqliyyat marşrutlarından biri olacaq. Bu baxımdan Horadiz-Ağbənd avtomobil yolunun tikintisinin başa çatmaq üzrə olması, dəmir yolunun Ermənistan sərhədinə qədər çəkilməsi, eyni zamanda, Naxçıvan dəmir yolu infrastrukturunun bərpasına başlanılması Azərbaycanın üzərinə götürdüyü öhdəlikləri ardıcıl şəkildə yerinə yetirdiyini göstərir. Ermənistan da öz ərazisindən keçən dəmir yolu infrastrukturunun yaradılması istiqamətində təşəbbüs göstərməlidir. Prezident İlham Əliyevin Naxçıvan dəmir yolunun yaxın gələcəkdə yükdaşıma qabiliyyətinin 15 milyon tona çatdırılması barədə fikirləri mühüm iqtisadi mesaj kimi qəbul edilir. Yükdaşıma həcminin 15 milyon tona çatdırılması yalnız Naxçıvanın və Azərbaycanın deyil, bütövlükdə Avrasiya məkanının iqtisadi tərəqqisinə xidmət edəcək. Bu, Naxçıvanın beynəlxalq və regional nəqliyyat sistemində rolunun daha da artmasına şərait yaradacaq”, - deyə professor vurğulayıb.
Bölmənin digər xəbərləri
