Naxçıvan Diaqnostika-Müalicə Mərkəzində növbəti angioqrafiya əməliyyatları aparılmışdır
Naxçıvan, 27 noyabr (AZƏRTAC). Naxçıvan Muxtar Respublikasında (MR) ürək xəstəliklərinin müasir müayinə və profilaktikası məqsədi ilə kardiologiyanın inkişaf etdirilməsi səhiyyə sistemi qarşısında prioritet məsələ kimi durur.
Bu sahədə tibbi xidməti daha da yaxşılaşdırmaq, xüsusən aztəminatlı ailələrdən olan xəstələrin muxtar respublikadan kənara getmədən müayinəsinin təşkili məqsədi ilə bir sıra mühüm işlər görülmüş, Naxçıvan Diaqnostika-Müalicə Mərkəzi və digər səhiyyə müəssisələrinin müasir tibbi avadanlıq və cihazlarla təchizatına ciddi diqqət yetirilmişdir.
Naxçıvan MR Səhiyyə Nazirliyinin mətbuat xidmətindən AZƏRTAC-a bildirmişlər ki, sosial layihələr çərçivəsində yüksək ixtisaslı həkim heyəti tərəfindən təkcə cari ilin ötən 9 ayında Naxçıvanda 159 cərrahiyyə əməliyyatı, o cümlədən 28 nəfər xəstədə açıq ürək, 5 nəfər xəstədə periferik damar, 71 xəstədə göz və 55 nəfər xəstədə digər müxtəlif əməliyyatlar aparılmış, 16 nəfər xəstənin ürək damarlarına stent qoyulmuşdur. Muxtar respublikaya dəvət olunaraq bir sıra çətin cərrahi əməliyyatlar həyata keçirən Mərkəzi Neftçilər Xəstəxanasının yüksək ixtisaslı həkim briqadaları tərəfindən 2007-ci ildən indiyədək 600-dən çox xəstə üzərində angioqrafiya əməliyyatı aparılmışdır.
Növbəti əməliyyatlar Naxçıvan Muxtar Respublikası Səhiyyə Nazirliyinin dəvəti ilə Mərkəzi Neftçilər Xəstəxanasının intervension kardiologiya bölməsinin müdiri, kardioloq-həkim, tibb üzrə fəlsəfə doktoru Abbasəli Abbasəliyev tərəfindən həyata keçirilmişdir. Diaqnostika-Müalicə Mərkəzinin həkimləri əvvəlcədən angioqraf müayinəsi edildikdən və stent müalicəsinə ehtiyacı olan xəstələri müəyyənləşdirdikdən sonra bu təcrübəli mütəxəssisin iştirakı ilə 26 xəstə üzərində ilkin angioqrafiya müayinəsi aparılmış, 13 nəfərin koronar arteriyalarında balon angioplastikası və stentin yerləşdirilməsi əməliyyatı həyata keçirilmişdir.
Koronarangioqrafiya ürəyin tac damarlarını müayinə etmək üçün ən informativ bir üsuldur. Bu üsul ürəyin tac damarlarının vəziyyəti haqqında geniş məlumat verir. Müayinə prosesində sağ və ya sol bud arteriyasından nazik tel (kateter) salınaraq ürəyin tac damarına qədər yeridilir. Sonra kontrast maddə vurularaq ürəyin tac damarlarının şüa müayinəsi aparılır. Ürəyin damarları haqqında dəqiq məlumat toplandıqdan sonra müəyyən nəticəyə gəlinir; xəstəyə stent qoyulmasına, yaxud kardiocərrahi əməliyyata, dərman müalicəsinə qərar verilir. Bu prosesin həyata keçirilməsi üçün Naxçıvan Diaqnostika-Müalicə Mərkəzində angioqrafiya bölməsi fəaliyyət göstərir. Bölmədə çalışan həkim və orta tibb işçiləri Bakı şəhərində, Türkiyə Respublikasının tanınmış səhiyyə müəssisələrində təkmilləşdirmə kurslarında olmuş, müasir müayinə metodlarına yiyələnmişlər. Diaqnostik müayinə və cərrahi müdaxilələrin aparılmasında naxçıvanlı həkimlərin də yaxından iştirak etməsi onların peşə vərdişi və təcrübə qazanmalarında, bu sahədə müstəqil şəkildə fəaliyyət göstərməsində xüsusi əhəmiyyət kəsb edir. Artıq bir çox sahələrdə diaqnostik müayinə və müalicələr yerli mütəxəssislər tərəfindən aparılır.
Hazırda Naxçıvan Diaqnostika-Müalicə Mərkəzində aparılan angioqrafiya əməliyyatlarında Abbasəli Abbasəliyev ilə yanaşı, naxçıvanlı kardioloq-həkimlər Süleyman Cəfərov və Nail Mehbalıyev də bilavasitə iştirak edirlər. Yardımçı işlər isə Naxçıvan Diaqnostika-Müalicə Mərkəzinin bilavasitə öz kadrları tərəfindən həyata keçirilir.
Bölmənin digər xəbərləri
