NAXÇIVANA BİLET SATIŞI BEYNƏLXALQ STANDARTLAR SƏVİYYƏSİNDƏ TƏŞKİL EDİLMİŞDİR
Bakı, 13 iyul (AZƏRTAC). Uzun illərdir ki, Naxçıvan sakinləri Ermənistan tərəfindən təcavüzün və blokadanın yaratdığı çətinlikləri öz üzərlərində hiss edirlər. Bu gün muxtar respublika əhalisini öz qohumları və yaxınları ilə birləşdirən yeganə “həyat yolu” Bakı ilə Naxçıvan arasında hava nəqliyyatıdır. Təsadüfi deyil ki, “Azərbaycan Hava Yolları” Qapalı Səhmdar Cəmiyyətinin rəhbərliyi bu istiqamətdə uçan sərnişinlərə xidmətin yaxşılaşdırılması, onlar üçün maksimum əlverişli şərait yaradılması məsələlərinə ciddi diqqət yetirir. Məhz bu məqsədlə bir neçə ay əvvəl Bakıdan Naxçıvana aviabilet satışı şəbəkəsi təyyarədə yerlərin avtomatlaşdırılmış bronlama sisteminə (ABS) daxil edilmişdir.
İndi sərnişin axını və reyslərin yüklənmə dərəcəsi barədə bir neçə ay əvvəl əyani və şəffaf mənzərə yaranır, bu isə sərnişinlərin tələbatını və zəruri reyslərin sayını qabaqcadan proqnozlaşdırmağa imkan verir. Bu sistemdə subyektiv amillər və aviabiletlərin əl ilə yazılması halları, demək olar, istisna edilir. Yaxın günlərdə bu istiqamətdə bilet satışını bütünlüklə aviabiletlərin elektron üsulla yazılması üzrə beynəlxalq sistemə qoşmaq nəzərdə tutulur. Bu halda sərnişinlər kağız biletlərdən ümumiyyətlə istifadə etməyəcəklər: uçuş üçün sərnişinlərin yalnız pasportlarını qeydiyyata təqdim etmələri kifayət olacaqdır.
Hələ yaxın keçmişdə aerokassanın binası qarşısında Naxçıvana bilet almaq istəyənlərdən ibarət uzun növbələr və qarmaqarışıqlıq adi hal idi. Bu vəziyyəti tənzimləmək praktik olaraq mümkün deyildi və biletlərin bölüşdürülməsində çox vaxt ədalətsizliyə yol verilirdi.
“Azərbaycan Hava Yolları” QSC-nin rəhbərliyi bu işdə qayda yaratmaq və sosial ədalətə nail olmaq üçün Heydər Əliyev adına beynəlxalq hava limanının yerli hava xətləri terminalının binasında Naxçıvana aviabiletlər satışı salonunda müasir texniki avadanlıq quraşdırdı. Buradakı tamamilə avtomatlaşdırılmış 12 rahat bilet kassası sərnişinlərə tez və yüksək səviyyədə xidmət etməyə imkan verir. Bu xidmətdən istifadə edən sərnişinlərin sayı gündə 500-600 nəfərə çatır. İndi aviabilet almaq üçün növbə xüsusi avtomatla tənzimlənir: sərnişinlərə sıra nömrələri verilir və kassalardan hər hansı biri boşaldıqda monitor və səsgücləndirici qurğu vasitəsilə növbəti sərnişin həmin kassaya dəvət edilir. Sərnişinləri məlumatlandırmaq üçün nəzərdə tutulan xüsusi ekranda növbəti reyslər üçün boş yerlərin sayı göstərilir. Aviaşirkət rəhbərliyi sərnişin axınından asılı olaraq, hər gün yerinə yetirilən reyslərin sayına düzəliş etməyi planlaşdırır. Hazırda Bakı-Naxçıvan marşrutu üzrə hər gün 10-11 reys yerinə yetirilir. Reyslər arasında fasilə 1-2 saat olur.
Aviabiletləri əvvəlcədən almaq arzusunda olan, lakin bundan ötrü hava limanına getmək istəməyən sərnişinlər üçün biletlərin telefon vasitəsilə qabaqcadan bronlanması xidməti yaradılmışdır və bu sistem uğurla fəaliyyət göstərir. Sərnişinlər 493-40-04 və ya 493-71-21 nömrələrinə zəng vuraraq soyadını, adını və pasportunun nömrəsini bildirməklə özlərinə lazım olan tarixdə və münasib reys üçün istədikləri sayda bilet sifariş edə bilərlər. Bundan sonra təyyarənin uçuş vaxtına ən azı 3 saat qalmış hava limanına gələrək öz aviabiletlərini rahat ala bilərlər. Xatırladaq ki, uçuş günü terminalın ikinci mərtəbəsindəki kassada bu cür sərnişinlərə növbədənkənar xidmət edilir. Qeydiyyat başa çatandan sonra reysdə boş yerlər qalarsa, elə buradaca təyyarəyə əlavə aviabilet almaq olar.
Gördüyümüz kimi, mövcud problemlər operativ həll edilir və ən başlıcası, sərnişinlər üçün maksimum əlverişli şərait yaradılır. Əlbəttə, hələ həll edilməmiş məsələlər də var. Məsələn, ictimai nəqliyyatla şəhərdən hava limanına gəlməklə bağlı çətinliklər mövcuddur. Ümid edirik ki, müvafiq strukturların köməyi ilə bu problem də tezliklə uğurla həll olunacaqdır.
AZƏRTAC-ın müxbiri belə bir eksperiment keçirmişdir: o, yuxarıda göstərilən nömrələrdən birinə zəng vuraraq, Naxçıvana uçan reyslərin birinə bilet sifariş etmişdir. İkinci zəng zamanı operator dəstəyi götürərək özünü təqdim etmiş, həmin reysdə yer olduğunu bildirərək bilet sifarişini qəbul etmişdir. Bütün bu prosedura təqribən 3 dəqiqə vaxt sərf olunmuşdur. Beləliklə, sistem işləyir. Vətəndaşlar yalnız bir qədər hövsələli olmalı, operatora zəng edib bilet sifariş etməlidirlər.
######
Bölmənin digər xəbərləri
