Naxçıvanda dövlət əmlakının özəlləşdirilməsi və icarəsi sahəsində görülən işlər açıqlanıb
Naxçıvan, 17 oktyabr, AZƏRTAC
Cari ilin yanvar–sentyabr ayları ərzində Naxçıvan Muxtar Respublikasında dövlət idarəçiliyinin təkmilləşdirilməsi, əmlak münasibətlərinin optimallaşdırılması və büdcə gəlirlərinin artırılması istiqamətində ardıcıl tədbirlər həyata keçirilib. Bu çərçivədə idarəetmə sistemində struktur islahatları aparılıb, dövlət əmlakının özəlləşdirilməsi və icarəsi sahəsində şəffaflıq və səmərəlilik yüksəldilib.
Naxçıvan Muxtar Respublikası Nazirlər Kabinetinin mətbuat xidmətindən AZƏRTAC-ın bölgə müxbirinə bildirilib ki, idarəetmənin təkmilləşdirilməsi istiqamətində 2025-ci ilin müvafiq dövründə iki dövlət qurumunun fəaliyyəti dayandırılıb, 70 dövlət əmlakı özəlləşdirilib.
Dövlət əmlakının özəlləşdirilməsindən ümumilikdə 1 milyon 92 min 140 manat vəsait toplanıb ki, bu məbləğin 819 min 105 manatı muxtar respublika büdcəsinə, 273 min 35 manatı isə xüsusi vəsait hesabına yönəldilib. 2025-ci ildə özəlləşdirmədən daxilolmalarda 43,2 faiz azalma qeydə alınıb.
Dövlət əmlakının icarəsindən büdcəyə daxilolmalar əhəmiyyətli dərəcədə artıb. Belə ki, 2024-cü ilin 9 ayı ilə müqayisədə 2025-ci ilin müvafiq dövründə icarə gəlirləri 204 min 561 manat və ya 70,6 faiz artaraq 494 min 221 manata çatıb. 2025-ci ilin 9 ayı ərzində qüvvədə olan icarə müqavilələrinin sayı 572 olub, bu da ötən ilin eyni dövrü ilə müqayisədə 20 müqavilə və ya 3,6 faiz çoxdur. İcarə müqavilələrindən 159-u torpaq, 413-ü isə qeyri-yaşayış sahələrinin icarəsinə aiddir. Torpaq icarəsi müqavilələrinin sayında 36 ədəd və ya 29,3 faiz artım, qeyri-yaşayış icarəsində isə 16 ədəd və ya 3,7 faiz azalma baş verib. Dövr ərzində 176 yeni icarə müqaviləsi bağlanılıb, 132 müqavilənin müddəti uzadılıb, 65 müqaviləyə isə xitam verilib.
2025-ci ilin yanvar-sentyabr aylarında muxtar respublikada torpaq idarəçiliyi, daşınmaz əmlakın qeydiyyatı, kadastr, yerquruluşu və rəqəmsal inkişaf sahələrində də ardıcıl tədbirlər həyata keçirilib, il ərzində torpaq kateqoriyasının dəyişdirilməsi və uçot işlərinin təkmilləşdirilməsi məqsədilə sistemli fəaliyyət həyata keçirilib.
Cari ilin yanvar-sentyabr ayları ərzində bələdiyyə ərazisində yerləşən torpaq sahələrinin ayrılması ilə bağlı 61 müraciət əsasında 196,4 hektar torpaq sahəsinə dair rəy hazırlanıb, 475 torpaq sahəsinin planı və ölçüsü dövlət kadastr kitablarında qeydiyyata alınıb.
İnnovasiyalar və rəqəmsal inkişaf sahəsində işlər davam etdirilib, hüquqi və fiziki şəxslər tərəfindən 1 322, notariat ofislərindən isə 4 min 93 elektron müraciət daxil olub. Bu göstərici ötən ilin eyni dövrü ilə müqayisədə 590 müraciət və ya 12,2 faiz çoxdur.
Daşınmaz əmlakın dövlət qeydiyyatı, inventarlaşdırılması və ünvan reyestrinin aparılması istiqamətində də ardıcıl tədbirlər həyata keçirilib. 2025-ci ilin doqquz ayında 7 min 733 daşınmaz əmlak üzərində mülkiyyət hüquqları qeydiyyata alınıb. Qeydiyyata alınmış əmlaklar üzrə torpaq sahələrinin sayı 3 min 387, fərdi yaşayış və bağ evlərinin sayı 2 936, qeyri-yaşayış binalarının sayı 156, qeyri-yaşayış sahələrinin sayı 162, mənzillərin sayı isə 1 064, əmlak kompleksi kimi müəssisələrin sayı isə 28 olub.
Hesabat dövründə daşınmaz əmlakın qeydiyyatı və kadastr xidmətlərindən 1 milyon 788 min 528 manat xidmət haqqı və 805 min 976 manat dövlət rüsumu daxil olub. 2024-cü ilin müvafiq dövrü ilə müqayisədə xidmət haqları üzrə 118 min 646 manat və ya 7,1 faiz artım qeydə alınıb.
Hesabat dövründə 359 yerquruluşu planı hazırlanıb, 297 torpaq sahəsində ölçmə işləri aparılıb, 13 xəritə və plan tərtib edilib Hesabat dövründə 53 hərrac keçirilib, 19 min 117 manat xidmət haqqı daxil olub.
Ümumilikdə 2025-ci ilin yanvar-sentyabr aylarında torpaq idarəçiliyi, daşınmaz əmlakın qeydiyyatı, yerquruluşu və rəqəmsal xidmətlər sahəsində, habelə dövlət əmlakının balans mənsubiyyətində yenilənmələr aparılıb, ləğv edilmiş və ya yenidən təşkil olunmuş qurumların balansında olan əmlakların digər dövlət orqanlarına təhvil verilməsi təmin edilib. Həyata keçirilən tədbirlər nəticəsində dövlət əmlakının idarəedilməsində şəffaflıq və hesabatlılıq artırılıb, vətəndaş müraciətlərinin elektron qaydada baxılması təmin olunub, xidmətlərin keyfiyyəti və əlçatanlığı yüksəldilib.
Bölmənin digər xəbərləri
