Naxçıvanda Milli Mətbuat Günü qeyd olundu
Naxçıvan, 22 iyul (AZƏRTAC, Rauf Əliyev). İyulun 22-də Naxçıvan şəhərində Milli Mətbuat Günü münasibətilə tədbir keçirildi.
AZƏRTAC xəbər verir ki, “Şərq qapısı” qəzetinin redaksiyasında keçirilən tədbirdə Naxçıvan Mətbuat Şurasının sədri Rövşən Hüseynov məruzə ilə çıxış etdi. Bildirdi ki, 1875-ci il iyulun 22-də “Əkinçi” qəzeti ilə əsası qoyulmuş Azərbaycan milli mətbuatı bütün zamanlarda öz sözünü deməyi bacaran, xalqımızın maariflənməsində, savadsızlığın və mövhumatın aradan qaldırılmasında dəyərli vasitə olub.
Bildirildi ki, “Əkinçi” qəzeti çar senzurasının qoyduğu qadağalardan kənara çıxaraq, Azərbaycanda demokratiya tribunasına çevrildi. Qəzetin xalqın maariflənməsində, milli özünüdərkin aşılanmasında rolunu görən çar Rusiyası imperiyası bunun heç də yaxşı nəticə verməyəcəyini anlayırdı. Odur ki, 1877-ci ilin sentyabrında “Əkinçi” hökumət tərəfindən bağlandı.
Qeyd olundu ki, Azərbaycanda bütün sahələrdə olduğu kimi, mətbuatın da inkişafı da ümummilli lider Heydər Əliyevin adı ilə bağlıdır. Xalqın təkidli tələbi ilə yenidən siyasi hakimiyyətə gələn Ulu Öndər mətbuata və KİV işçilərinə daim hörmət və diqqətlə yanaşırdı. Ümummilli lider Heydər Əliyevin rəhbərliyi ilə hazırlanan və 1995-ci il noyabrın 12-də ümumxalq referendumda qəbul edilən Azərbaycan Respublikasının Konstitusiyasında dövlət tərəfindən fikir və söz azadlığının qorunmasına zəmanət verildi. Mətbuatın inkişafı qarşısında ən böyük əngələ çevrilən senzura isə Ulu Öndərin “Azərbaycan Respublikasında söz, fikir və mətbuat azadlığının təmin edilməsi sahəsində əlavə tədbirlər haqqında” 1998-ci il 6 avqust tarixli Fərmanı ilə aradan qaldırıldı. Senzuranın ləğvi, həm də Azərbaycanın hüquqi, dünyəvi dövlət quruculuğu yolunda inamla irəlilədiyini göstərən əsaslı faktlardan biridir.
Muxtar respublikada mətbuatın inkişafına göstərilən dövlət qayğısından da danışan şura sədri əlavə etdi ki, məhz bu diqqət və qayğı sayəsində Naxçıvanda fəaliyyət göstərən qəzetlər həm məzmununa, həm də formasına görə yenilənib. Naxçıvan Muxtar Respublikası Ali Məclisi Sədrinin 2000-ci il martın 29-da imzaladığı müvafiq Sərəncamdan sonra muxtar diyarda fəaliyyət göstərən dövlət mətbuat orqanlarının əməkdaşlarının bütün problemləri öz həllini tapıb. 2010-cu ildə yeni redaksiya-nəşriyyat kompleksi yaradılıb, qəzetlərin rəngli nəşri təmin olunub. Mətbuat orqanlarında çalışanların əməyi də yüksək qiymətləndirilib. Bu günədək muxtar respublika jurnalistlərindən 2-si Azərbaycan Respublikası Prezidentinin fərdi təqaüdünə, 10-u müxtəlif orden və medallara layiq görülüb, 35 nəfər isə Azərbaycan Respublikasının və Naxçıvan Muxtar Respublikasının fəxri adları ilə təltif olunub.
Qəzetlərin maddi-texniki bazasının möhkəmləndirilməsi istiqamətində də mühüm addımlar atıldığını deyən Rövşən Hüseynov bildirdi ki, ötən il “Şərq qapısı”, şəhər və rayon qəzetləri dövlətimizin qayğısı sayəsində kompyuter dəstləri, fotoaparat və digər zəruri texniki avadanlıqlarla təmin olunublar. Jurnalistlərin peşəkarlığının artırılması və fəaliyyətlərinin stimullaşdırılması istiqamətində də bir sıra yaradıcılıq müsabiqələri və müxtəlif tədbirlər həyata keçirilib. Ali Məclis Sədrinin mətbuat işçiləri ilə tez-tez görüşməsi və onlara tövsiyələr verməsi, KİV sahəsində çalışan hər bir şəxsin məsuliyyət hissini daha da artırıb, fəaliyyətinə stimul verib.
Tədbirdə “Arazın səsi” qəzetinin redaktoru, Naxçıvan Muxtar Respublikasının Əməkdar Jurnalisti Hüseyn Şəkərəliyev, “Oğuz səsi” qəzetinin redaktoru Şəhla Nəbiyeva, “Şərq qapısı” qəzeti baş redaktorunun müavini Səyyar Məmmədov muxtar respublikada mətbuata göstərilən qayğıdan bəhs etdilər.
Naxçıvan Muxtar Respublikası Ali Məclisi Aparatının mətbuat və ictimaiyyətlə əlaqələr şöbəsinin baş məsləhətçisi Ülvi Hüseynli muxtar respublikada mətbuatın inkişafı üçün görülən işlərdən, yaradılan şəraitdən söhbət açdı, bu gün dövlətimizin jurnalistlərin əməyinə yüksək qiymət verdiyini vurğuladı. Ülvi Hüseynli tədbir iştirakçılarını və ümumilikdə, muxtar respublikanın mətbuat orqanlarında çalışan jurnalistləri Milli Mətbuat Günü münasibətilə təbrik etdi, onlara qələmə aldıqları məqalələrlə qədim diyarın bugünkü inkişaf və tərəqqi salnaməsini yaratmaqda uğurlar arzuladı.
Bölmənin digər xəbərləri
