Naxçıvanda musiqi mədəniyyəti yüksək səviyyədədir
Naxçıvan, 17 may, AZƏRTAC
Norveçli məşhur xor dirijoru və müəllimi Per Oddvar Hildre və Azərbaycanın incəsənət xadimlərindən ibarət nümayəndə heyəti mayın 16-17-də Naxçıvan Muxtar Respublikasında səfərdə olub. Nümayəndə heyəti Naxçıvan şəhərindəki təhsil və mədəniyyət müəssisələri ilə tanış olub, norveçli dirijor xor kollektivləri üçün ustad dərsi keçib.
AZƏRTAC-ın Naxçıvan bürosunun əməkdaşları qonaqlardan bir neçəsi ilə həmsöhbət olub, onların təəssüratlarını öyrənib. Norveçli musiqiçi, əfsanəvi “Skruk” xorunun dirijoru Per Oddvar Hildre deyib: Bir çox illər əvvəl, 1997-ci ildə ilk dəfə ölkənizin paytaxtı Bakıda olarkən İlqar Muradov və Siyavuş Kərimi mənə Naxçıvana getməyi tövsiyə etdilər. Onlar mənə bu torpağın Azərbaycanın ən gözəl guşələrindən biri olduğunu deyərək, təmiz hava, təmiz su, ən əsası təmizürəkli insanları görmək üçün Naxçıvana səfər etməyi məsləhət bildilər. Mən belə bir imkanı yalnız bu il tapa bildim. Naxçıvana dəvət edildim və artıq burdayam.
“İlk olaraq havanın təmizliyi mənə çox xoş təsir bağışladı. Hava limanından enərkən gördüyümüz uca dağlar, yaşıllıq və təmiz şəhər mənə çox gözəl təəssürat bəxş etdi. Sonra biz konservatoriyaya getdik və burada gözəl mahnı oxuyan gəncləri görmək ürəyimcə oldu”, - deyən Per Oddvar Hildre qeyd edib ki, Azərbaycan yüksək musiqi mədəniyyətinə malikdir. Azərbaycanda tarixən dahi şairlər və musiqiçilər olub. Hər bir musiqi xadimi üçün bu mədəniyyətlə tanış olmaq böyük şərəfdir.
O vurğulayıb ki, böyük siyasətçi Heydər Əliyev Azərbaycanda mədəniyyətin inkişafına xüsusi diqqət göstərib. Dahi şəxsiyyət musiqi, teatr, rəsm və rəqs sənətinin böyük hamisi olub, özü də bu sənət növləri ilə maraqlanıb.
Oddvar Hildre deyib: Düşünürəm ki, dünyanın digər yerlərində yaşayanlar Azərbaycan mədəniyyətini öyrənməlidirlər. Bu, çox vacibdir. Naxçıvanda bizə göstərilən qonaqpərvərliyə görə bir daha minnətdaram. Burada özümü çox xoşbəxt və rahat hiss edirəm. Bir norveçli turist üçün bu, çox böyük hisslərdir.
Azərbaycan Milli Konservatoriyasının rektoru, Xalq Artisti Siyavuş Kərimi bildirib ki, Naxçıvanda yüksək səviyyəli beynəlxalq tədbirlərin keçirilməsi üçün hərtərəfli şərait var: “Naxçıvana gəlişimizin məqsədi bu qədim diyarın gözəlliyini, onun mədəniyyətinin inkişafını, yüksəlişini yaxından görmək, gələcəkdə muxtar respublikada hər hansı bir beynəlxalq layihənin ərsəyə gəlməsini müzakirə etmək, qarşılıqlı əlaqələri inkişafına nail olmaqdır. Çünki Naxçıvan musiqi sahəsində də gözəl sənətkarlar yetişdirən bir diyardır. Bu gün bir çox naxçıvanlı sənətkar Azərbaycan mədəniyyətinin inkişafına öz töhfələrini verir. Biz bir azərbaycanlı kimi bundan böyük qürur duyuruq”.
Siyavuş Kərimi səfər çərçivəsində Naxçıvan Dövlət Universitetinin Konservatoriyasında olduqlarını, bir musiqiçi kimi oradakı xor kollektivinin ifasının ona çox gözəl təsir bağışladığını bildirərək deyib ki, həqiqətən də, Naxçıvanda uşaqların musiqi təhsili olduqca ürəkaçandır. Bu mənada zəhmətkeş müəllimlər ürəkdən alqışa layiqdirlər ki, belə istedadlı uşaqları yetişdirib səhnəyə çıxarırlar.
Azərbaycan Milli Konservatoriyasının nəzdində fəaliyyət göstərən Musiqi Kollecinin direktoru, Əməkdar İncəsənət Xadimi, professor Nazim Kazımov isə qeyd edib ki, Naxçıvanda dünyaya göz açıb, bu torpağın havası, suyu, çörəyi ilə böyüyüb.
“Ötən ilin yaz aylarında qədim diyara ekskursiya edən zaman buranın inanılmaz dərəcədə gözəlləşdiyini, müasir şəraitə malik olduğunu gördüm. Bu il də musiqiçi həmkarlarımla birlikdə Naxçıvana gəlməyi qərara aldıq”, - deyən Nazim Kazımov qeyd edib ki, səfər zamanı Naxçıvanda musiqi mədəniyyətinin, təhsilin necə böyük sürətlə inkişaf etdiyinin şahidi olublar: “Musiqi sahəsinə dərindən bələd olan biri kimi deməliyəm ki, burada 27 musiqi məktəbinin, musiqi kollecinin və konservatoriyanın, filarmoniyaların, ansamblların fəaliyyət göstərməsi, hər il yüzlərlə tələbənin musiqi təhsilini başa vuraraq ixtisaslı kadr kimi yetişməsi böyük bir zəhmətin nəticəsidir. Bu yurdun övladı kimi bütün bu gözəlliklər məni inanılmaz dərəcədə sevindirir. İnanıram ki, gələcəkdə bu diyara tez-tez üz tutacağıq”.
“Qaya” ansamblının üzvü Rauf Babayev qeyd edib ki, Naxçıvan ona çox doğma və əzizdir. O deyib: Mənim anam burada dünyaya göz açıb, uşaqlıq çağlarım Naxçıvanda keçib. Həqiqətən də, doğru deyirlər ki, uşaqlıq illərində yaşananlar hər zaman insanın yaddaşında qalır, o illərdə olanları unutmaq olmur. Yaxşı yadımdadır, həmin illərdə nənəm bizə təndir çörəyindən pendir dürməyi düzəldər, dadlı pomidorla yeyərdik. Nənəmgil Bakıya gələn zaman mənə mütləq həmin təndir çörəklərindən, dadlı Naxçıvan pendirindən gətirərdilər, indi burada olarkən nostalji duyğuları yenidən yaşadım”.
“Ötən əsrin 70-80-ci illərində bir dəfə “Qaya” ansamblının üzvü kimi Naxçıvanda olmuşam. Sonralar mən 9 uşaqdan ibarət “Bəri bax” ansamblını yaratdım, müstəqillik illərində həmin kollektivlə dünyanın bir sıra ölkələrində konsertlər verdik”, - deyən Rauf Babayev qeyd edib ki, həmin kollektivin repertuarına görkəmli bəstəkar Məmməd Məmmədovun bəstələdiyi Naxçıvanla bağlı gözəl bir mahnı da salınıb. 2000-ci ilin əvvəllərində qədim diyara üz tutan zaman da həmin ansambl o mahnını ifa edib.
Rauf Babayev deyib: “Budəfəki gəlişimdə diqqətimi çəkən ən mühüm cəhətlərdən biri də ayrı-ayrı təşkilatlarla yanaşı, insanların da təmizliyə, səliqə-sahmana xüsusi fikir vermələri oldu. Bildiyimiz ki, yaradıcı insanlar, sənətə bağlı olanlar üçün sakit yerdə öz düşüncələri ilə baş-başa qalmaq ən gözəl duyğudur. Həzin küləyin təsiri ilə yarpaqların asta-asta əsməsi, quşların cəh-cəhi, suyun şırıltısı insana sanki vücudunu titrədən lirik bir musiqi təsiri bağışlayır. Sevinirəm ki, mən Naxçıvanda o lirikliyi, rahatlığı, ruhumun dincəldiyini hiss edə bildim”.
Bölmənin digər xəbərləri
