Naxçıvanın mövqeyi onu regional nəqliyyat və enerji qovşağına çevirmək imkanı yaradır - ŞƏRH
Bakı, 13 avqust, AZƏRTAC
Naxçıvan Muxtar Respublikasında son dövrlərdə həyata keçirilən layihələr və Prezident İlham Əliyevin dünənki səfəri regionun sosial-iqtisadi, idarəetmə və təhlükəsizlik arxitekturasının yeni mərhələyə keçdiyini göstərir. Prezident İlham Əliyevin verdiyi açıqlamalardan görünür ki, regionda əsas hədəf təhlükəsizlik və sabitliklə yanaşı, dayanıqlı və sürətli sosial-iqtisadi inkişafa nail olmaqdır.
Bu fikirləri AZƏRTAC-a açıqlamasında beynəlxalq əlaqələr üzrə mütəxəssis Bayram Əliyev deyib.
Onun sözlərinə görə, Naxçıvanın daxili inkişafında və inzibati strukturunda mühüm yeniliklər tətbiq olunur. Naxçıvan şəhərinin 2044-cü ilədək olan Baş Planına əsasən, şəhərin müasir standartlara uyğun yenidən qurulması, nəqliyyat, yol və ictimai nəqliyyat infrastrukturunun təkmilləşdirilməsi nəzərdə tutulur. Bu, Naxçıvanın beynəlxalq standartlara uyğun müasir şəhərə transformasiyası baxımından böyük əhəmiyyət daşıyır.
“İdarəetmə sahəsində isə Qarabağ və Şərqi Zəngəzurda özünü doğrultmuş idarəetmə modelinin Naxçıvanda tətbiqi struktur islahatlarının səmərəliliyini artırmağa xidmət edir. Eyni zamanda, DOST və “ASAN Xidmət” mərkəzlərinin fəaliyyətinin genişləndirilməsi vətəndaşlara göstərilən xidmətlərin keyfiyyətini yüksəldir. Bu addımlar Naxçıvanın zəngin tarixi-mədəni irsinin qorunması və milli kimliyin yaşadılması ilə paralel şəkildə həyata keçirilir. Memar Əcəmi abidəsinin açılışı və Şərqin incisi Möminə xatun türbəsinin restavrasiyası da bu istiqamətdə atılan mühüm addımlardandır. Bununla yanaşı, müasir otelçilik və turizm infrastrukturunun inkişafı da diqqət mərkəzindədir”, - deyə mütəxəssis bildirib.
B.Əliyev qeyd edib ki, Naxçıvanın xüsusi coğrafi mövqeyi onu regional nəqliyyat və enerji qovşağına çevirmək imkanı yaradır. Zəngəzur dəhlizi və TRIPP layihəsi siyasi təşəbbüs olmaqla yanaşı, Azərbaycan, Ermənistan və beynəlxalq tərəfdaşların iştirakı ilə praktiki icra mərhələsinə keçən strateji layihədir. Bu xətt Naxçıvanı Şərq-Qərb və Şimal-Cənub nəqliyyat marşrutlarının kəsişdiyi regional haba çevirmək potensialına malikdir.
“Bundan başqa, Zəngəzur dəhlizi yalnız nəqliyyat daşımaları ilə məhdudlaşmır. Gələcəkdə bu marşrut boyunca elektrik, fiber-optik və digər kommunikasiya xətlərinin çəkilməsi ilə onun çoxfunksiyalı regional dəhlizə çevrilməsi planlaşdırılır. Naxçıvanın daxili enerji təhlükəsizliyi artıq təmin olunmuş hesab edilir. İndiki əsas istiqamət mövcud enerji sistemini daha da gücləndirmək və ixrac imkanlarını genişləndirməkdir. Naxçıvanın zəngin Günəş və su enerjisi potensialından istifadə etməklə regionun gələcəkdə təkcə enerji ilə təmin olunan deyil, həm də elektrik enerjisi ixrac edən mərkəzə çevrilməsi nəzərdə tutulur.
Həmçinin daxili iqtisadiyyatın canlandırılması üçün Naxçıvan Sənaye Parkının yaradılması yeni istehsal müəssisələrinin açılmasına və iş yerlərinin formalaşmasına şərait yaradır. Kənd təsərrüfatı sahəsində isə suvarma infrastrukturunun yenilənməsi və yeni su mənbələrinin yaradılması aqrar inkişafın əsas dayaqlarından biri hesab olunur. Bununla yanaşı, Naxçıvanın anklav mövqeyi onun müdafiə potensialının daim gücləndirilməsini strateji zərurətə çevirir. Əlahiddə Ümumqoşun Orduda yeni komando birliklərinin yaradılması və döyüş bayraqlarının təqdim edilməsi regionun təhlükəsizlik çətirinin möhkəmləndirilməsinə xidmət edir”, - deyə o əlavə edib.
Mütəxəssisin fikrincə, Naxçıvanda həyata keçirilən tədbirlər regionun təhlükəsizliyinin təmin olunmasına, müasir şəhərsalma, yeni idarəetmə mexanizmləri, yaşıl enerji ixracı və beynəlxalq logistika şəbəkələrinə inteqrasiya vasitəsilə dayanıqlı sosial-iqtisadi inkişafın təmin edilməsinə yönəlib.
Bölmənin digər xəbərləri
