Sentyabrın 21-də Nazirlər Kabinetində baş nazir Artur Rasizadənin sədrliyi ilə iclas keçirilmişdir. İclasın gündəliyinə Azərbaycan Respublikasının 2003-cü il üçün dövlət büdcəsinin layihəsi və ölkənin sosial-iqtisadi inkişaf konsepsiyası və əsas proqnoz göstəriciləri ilə bağlı məsələlər daxil edilmişdi. 

İqtisadi inkişaf naziri Fərhad Əliyev sosial-iqtisadi inkişaf konsepsiyasının əsas göstəriciləri barədə çıxış etdi. O bildirdi ki, özəlləşdirmə proqramının yerinə yetirilməsi, torpaq islahatının həyata keçirilməsi və özəl sahibkarlığın inkişafı nəticəsində 2001-ci ildə ümumi daxili məhsulun (ÜDM) özəl sektordakı xüsusi çəkisi 71 faiz təşkil etmişdir. Cari ilin 8 ayı ərzində ÜDM -in real artımı 9,4 faiz, deflyator indeksi isə 99,6 faiz olmuşdur.

Nazir vurğuladı ki, Azərbaycan Prezidenti Heydər Əliyevin əhalinin həyat səviyyəsinin ardıcıl surətdə yüksəldilməsi, yoxsulluğun azaldılması, iqtisadiyyatın sürətli artımının təmin edilməsi sahəsində müəyyənləşdirdiyi öncül istiqamətlərə uyğun olaraq, 2003-cü ildə bir sıra tədbirlər həyata keçiriləcəkdir. Məsələn, yerli və xarici sahibkarlar üçün sərmayə qoyuluşunun və təsərrüfat şəraitinin yaxşılaşdırılması, vergi və gömrük sistemlərinin səmərəliliyinin artırılması, tarazlaşdırılmış büdcə siyasətinin aparılması, inhisarçıların tariflərinin təkmilləşdirilməsi və sairə nəzərdə tutulur.

Fərhad Əliyev 2003-cü ilin sosial-iqtisadi inkişaf konsepsiyasının proqnoz göstəricilərini şərh edərək vurğuladı ki, gələn il ÜDM istehsalı 32,8 trilyon manata çatacaq, real artım sürəti isə 9,5 faiz təşkil edəcəkdir. Kiçik və orta sahibkarlığın inkişafına 50 milyard manat ayırmaq nəzərdə tutulmuşdur ki, bu da ÜDM-də özəl sahibkarlığın xüsusi çəkisini 72,5 faizə çatdırmağa imkan verəcəkdir. Neft sektorunun səmərəliliyini artırmaq üçün ciddi islahatlar aparmaq nəzərdə tutulur. Xam neftin və bəzi neft məhsullarının sənaye və topdansatış qiymətlərini dünya standartlarına uyğunlaşdırmaq üçün ilkin tədbirlər görüləcəkdir. Dövlət Neft Şirkəti strukturunun təkmilləşdirilməsi də gündəlikdədir. Nazir bildirdi ki, 2003-cü ildə bütün maliyyə mənbələri üzrə sərmayə qoyuluşu 2,6 milyard dollara çatacaq, ümumi sərmayələrdə xarici sərmayələrin xüsusi çəkisi 77,8 faiz təşkil edəcəkdir.

Maliyyə naziri Əvəz Ələkbərov 2002-ci il dövlət büdcəsinə dair proqnozların yerinə yetirilməsinin gedişi barədə məlumat verdi. O bildirdi ki, cari ilin 8 ayı ərzində dövlət büdcəsinin məxaric hissəsi 2 trilyon 802 milyard manat təşkil etmişdir ki, bu da ötənilki göstəricidən 22,6 faiz çoxdur. Büdcə kəsirinin maliyyələşdirilməsi 218 milyard manat olmuşdur.

Nazir 2003-cü il üçün dövlət büdcəsi layihəsindən danışaraq xatırlatdı ki, o, ölkənin sosial-iqtisadi inkişaf konsepsiyası və əsas proqnoz göstəriciləri əsasında işlənib hazırlanmışdır. O dedi ki, makroiqtisadi tədbirlərin və maliyyə-kredit siyasətinin davam etdirilməsi, sahibkarlığın inkişafı, Yoxsulluğun azaldılmasına dair dövlət proqramının maliyyələşdirilməsinin artırılması, ölkənin sərhəd və dağ rayonlarının iqtisadi inkişafı gələn ilin büdcə siyasətinin öncül istiqamətlərindəndir. Əvəz Ələkbərov vurğuladı ki, gələn ilin dövlət büdcəsi layihəsində təhsil işcilərinin əmək haqqının artırılmasına 141 milyard manat, ümumilikdə, büdcə təşkilatları işçilərinin əmək haqlarının artırılmasına isə 283 milyard manat ayırmaq nəzərdə tutulur.

Dövlət büdcəsi layihəsində başlıca yenilik əhalinin enerji daşıyıcıları ilə təmin edilməsi üçün dövlətin birbaşa subsidiyalarının həcminin göstərilməsi olacaqdır. Bu, 1 trilyon 418 milyard manat təşkil edəcəkdir.

Sonra Vergilər naziri Fazil Məmmədov, gənclər, idman və turizm naziri Əbülfəz Qarayev, Milli Məclisin iqtisadi siyasət daimi komissiyasının sədri Səttar Səfərov, sosial siyasət daimi komissiyasının sədri Hadı Rəcəbli və başqaları çıxış edərək, 2003-cü il üçün Dövlət büdcəsi layihəsinə dair təkliflər irəli sürdülər.

Baş nazir Artur Rasizadə iclasa yekun vuraraq, büdcə göstəricilərinin artırılmasının və dövlət büdcəsinin mədaxil və məxaric hissələrinin dəqiq yerinə yetirilməsinin vacidliyini nəzərə çarpdırdı. O, bildirdi ki, dövlət büdcəsi layihəsində Azərbaycan Prezidenti Heydər Əliyevin son fərman və sərəncamları ilə bağlı olan xeyli yeniliklər vardır.

Müzakirələrin yekununa əsasən, “Azərbaycan Respublikasının 2003-cü il üçün dövlət büdcəsi layihəsi və ölkənin sosial-iqtisadi inkişaf konsepsiyası və əsas proqnoz göstəriciləri haqqında” qərar qəbul olundu.