NDU ilə Çinin Urumçi Peşə Universiteti arasında anlaşma memorandumu imzalanıb
Naxçıvan, 13 iyul, AZƏRTAC
İyulun 13-də Naxçıvan Dövlət Universiteti ilə Çinin Urumçi Peşə Universiteti (Urumqi Vocational University) arasında təhsil, elm və innovasiya sahələrində əməkdaşlığın inkişaf etdirilməsini nəzərdə tutan anlaşma memorandumu imzalanıb.
Universitetin Media və ictimaiyyətlə əlaqələr şöbəsindən AZƏRTAC-ın bölgə müxbirinə bildirilib ki, imzalanma mərasimi onlayn formatda keçirilib.
Sənədə əsasən, tərəflər qarşılıqlı maraq doğuran sahələrdə birgə elmi tədqiqat layihələrinin həyata keçirilməsi, tədris və elmi fəaliyyət istiqamətində əməkdaşlığın genişləndirilməsi, müəllim, tələbə və inzibati heyət mübadiləsinin təşkili barədə razılığa gəliblər.
Anlaşma memorandumunda logistika, turizm, süni intellekt, rəqəmsal media, incəsənət, tibb, yeni enerji və istehsal sahələrində əməkdaşlıq imkanlarının inkişaf etdirilməsi nəzərdə tutulur. Sənədə əsasən, tərəflər birgə akademik proqramların və ikili diplom layihələrinin, o cümlədən “3+1” modeli üzrə bakalavr proqramlarının hazırlanması və həyata keçirilməsi istiqamətində birgə fəaliyyət göstərəcəklər.
Memorandum çərçivəsində sənayeyönümlü təcrübələrin, yay məktəblərinin və praktiki təlim proqramlarının təşkili, tələbə və akademik heyətin mobilliyinin artırılması, mübadilə proqramlarının həyata keçirilməsi və birgə tədris-tədqiqat fəaliyyətlərinin inkişaf etdirilməsi planlaşdırılır.
Həmçinin Süni İntellekt Mərkəzinin yaradılması və inkişafı, bu sahədə birgə tədqiqatların aparılması, təlimlərin keçirilməsi, Çin dili və mədəniyyəti üzrə təhsil proqramlarının yaradılması və mədəni əlaqələrin genişləndirilməsi istiqamətləri sənəddə öz əksini tapıb. Bununla yanaşı, tərəflər birgə seminar, konfrans və qısamüddətli kursların təşkili, elmi və akademik nəşrlərin mübadiləsi, hibrid formatda (onlayn və əyani) kursların həyata keçirilməsi, elmi tədqiqat və təhsil resurslarından qarşılıqlı istifadə imkanlarının yaradılması barədə razılıq əldə ediblər.
Qeyd edək ki, anlaşma memorandumu qardaşlaşmış şəhərlər olan Naxçıvan və Urumçi arasında əlaqələrin daha da genişlənməsinə mühüm töhfə verəcək.
Tədbirdə çıxış edən Urumçi Peşə Universitetinin prezidenti Tang Xiaobing bildirib ki, bu gün imzalanan sənəd iki universitet arasında uzunmüddətli və sabit əməkdaşlıq əlaqələrinin əsasını qoyur. Azərbaycanın qədim İpək Yolunun mühüm qovşaqlarından və Çinin strateji tərəfdaşlarından biri olduğunu vurğulayan Tang Xiaobing iki ölkə arasında inkişaf edən əlaqələrin ali təhsil müəssisələri arasında əməkdaşlıq üçün geniş imkanlar yaratdığını qeyd edib, təhsil, mədəniyyət və mübadilə sahələrində birgə fəaliyyətin əhəmiyyətindən danışıb.
Rektor Elbrus İsayev Naxçıvan Dövlət Universitetinin nümayəndə heyətinin Urumçi Peşə Universitetində olduğunu, həmin görüşlər zamanı birgə elmi tədqiqat, tələbə və müəllim mübadiləsi, Çin dili təhsili və digər istiqamətlər üzrə müzakirələrin aparıldığını qeyd edib. Vurğulayıb ki, anlaşma memorandumu iki universitet arasında yeni əməkdaşlıq mərhələsinin başlanğıcını qoyur.
NDU-nun rektoru Azərbaycan və Çin arasında ali təhsil sahəsində inkişaf edən əlaqələrin əhəmiyyətindən danışaraq, yeni əməkdaşlığın iki universitet üçün mühüm imkanlar yaradacağına və qarşılıqlı layihələrin həyata keçirilməsinə töhfə verəcəyinə əminliyini ifadə edib.
Müxbir - Nail Əsgərov
Bölmənin digər xəbərləri
