NƏQLİYYAT NAZİRİ ZİYA MƏMMƏDOVUN CIXIŞI
- Cari ilin birinci rübündə nəqliyyat kompleksi üzrə 25,6 milyon ton yük və 209 milyon sərnişin daşınmışdır. Ötən ilin müvafiq dövrü ilə müqayisədə yük daşımaları 10,4, sərnişin daşımaları isə 5,3 faiz artmışdır. Yük daşımalarının 56,6 faizi, sərnişin daşımalarının isə 99,2 faizi özəl sektorun payına düşür. Ümumi daxili məhsulun strukturunda nəqliyyatın xüsusi çəkisi 6,2 faiz təşkil etmişdir. Yüklərin 7 milyon tonu dəmir yolu, 3,3 milyon tonu dəniz, 15,3 milyon tonu avtomibil nəqliyyatı ilə daşınmışdır. Avropa-Qafqaz-Asiya nəqliyyat dəhlizində ilin üç ayı ərzində yükdaşımaların həcmi 14 faiz artaraq 11,7 milyon ton olmuşdur.
Nəqliyyat kompleksində işçilərin orta aylıq əmək haqqı 185 manata çatmışdır. Bu dövr ərzində 663 yeni iş yeri açılmışdır. Hesabat dövründə Gəncə hava limanının, Bakı beynəlxalq avtovağzal kompleksinin tikintisində işlər davam etdirilmiş, Lənkəran hava limanının yenidən qurulmasına başlanılmış, Şəki hava limanının tikintisinə hazırlıq işləri aparılmışdır.
Xəzər Dəniz Gəmiçiliyi tərəfindən 13,4 min ton yükgötürmə qabiliyyəti olan “Koroğlu” tankeri alınmış, Bakı dəniz vağzalı əsaslı təmir olunmuşdur. Dəmir yolunda çən vaqonların yuyulması stansiyasında yenidənqurma işləri başa çatdırılmış, gün ərzində 250 çən vaqonun daxildən və ilk dəfə olaraq xaricdən yuyulması, çirkab suların tam təmizlənməsi texnologiyaları tətbiq edilmişdir. 2005-ci il 28 dekabr tarixli Fərmanınıza uyğun olaraq, avtomobil nəqliyyatı ilə beynəlxalq, şəhərlərarası, şəhərdaxili sərnişin və yük daşımaları fəaliyyətinə lisenziyaların verilməsi ilə bağlı sənədlərin rəsmiləşdirilməsi prosesinə başlanmışdır.
Daşıyıcıların vergiyə cəlb edilməsi məqsədi ilə cari ilin mart ayından etibarən avtonəqliyyat vasitələrinə fərqlənmə nişanlarının verilməsinə başlanmış, indiyədək 24 min 622 ədəd fərqlənmə nişanı verilərək, dövlət büdcəsinə 618 min manat vəsait ödənilmişdir. Bu, 2005-ci il ərzində bütövlükdə bu sahə üzrə dövlət büdcəsinə daxil olan vəsaitə bərabərdir.
Möhtərəm cənab Prezident, icazə verin, daim diqqət mərkəzində saxladığınız regionların sosial-iqtisadi inkişafı Dövlət Proqramının, regionlara səfərləriniz zamanı bölgələrin inkişafı və əhalinin sosial şəraitinin yaxşılaşdırılması, həmçinin Bakı şəhərinin və qəsəbələrinin inkişafı ilə bağlı imzaladığınız sərəncamların icra vəziyyəti barədə məlumatları Sizə məruzə edim.
Hesabat dövründə 144 kilometr respublika əhəmiyyətli, rayon və kəndlərarası avtomobil yolları təmir olunmuşdur. Bakı-Ələt-Qazax-dövlət sərhədi, Bakı-Quba-dövlət sərhədi, Ələt-Astara-dövlət sərhədi magistral avtomobil yollarında yenidənqurma işləri davam etdirilmişdir. 94 kilometr uzunluğunda olan Gəncə-Qazax avtomobil yolunda işlər yekunlaşdırılır və cari ilin iyul ayında istismara hazır olacaqdır. Əsas magistral yolun uzunluğu 85,6 kilometr olan Hacıqabul-Kürdəmir hissəsində İtaliyanın “Todimi” şirkəti tərəfindən işlər davam etdirilir və 2007-ci ilin oktyabr ayında başa çatdırılacaqdır.
Magistralın Kürdəmir-Ucar (46,2 kilometr), Ucar-Yevlax (53 kilometr), Yevlax-Gəncə (88,8 kilometr) və Qazax-dövlət sərhədi (38 kilometr) hissələrinin yenidən qurulması ilə bağlı məsləhətçi və podratçı firmaların seçilməsi məqsədi ilə müsabiqələr keçirilibdir. Maliyyələşdirilmə məsələlərinin tam həlli məqsədi ilə Sizin razılığınız əsasında Asiya İnkişaf Bankı 52 milyon ABŞ dolları, Küveyt Fondu ilə 14 milyon ABŞ dolları yaxın günlərdə kredit sazişləri imzalanacaqdır. Tikinti işlərinə 2006-cı ilin sonu və 2007-ci ilin əvvəllərində başlanacaqdır.
Bakı-Quba-dövlət sərhədi avtomobil yolunun texniki-iqtisadi əsaslandırılması və dizayn işləri Belçikanın “Eko” şirkəti tərəfindən hazırlanmışdır. Layihələndirmə zamanı marşrutun optimallaşdırılması hesabına, yolun uzunluğu 16 kilometr qısaldılacaqdır. Tikinti ilə bağlı maliyyələşmə məsələləri tam həll olunmuş, Çexiyanın “Rno” şirkəti yolun 111-ci kilometrindən dövlət sərhədinə qədər hissəsinin tikinti işlərinə başlamışdır.
Ziya Məmmədov daha sonra magistral yolların texniki-iqtisadi əsaslandırılması layihələri, eləcə də Bakı şəhərində avtomobil nəqliyyatının hərəkətində yaranmış problemlərin aradan qaldırılması ilə bağlı layihələrin nəzərdə tutulan müddətlərdə başa çatacağını bildirərək dedi ki, zati-aliləri, xahiş edirəm, vaxt məhdudluğu səbəbindən ölkəmizin nəqliyyat infrastrukturunun yeniləşdirilməsi və bu sahədə görülən digər işlər barədə məlumatların tam əhatə olunmadığını nəzərə alasınız. Sizi əmin edirəm ki, müəyyən olunmuş infrastruktur layihələri üzrə hazırda görülən və gələcəkdə həyata keçirilməsi nəzərdə tutulan işlər sayəsində ölkəmizin nəqliyyat sisteminin daha sürətli inkişafına nail olunacaqdır. Diqqətinizə görə minnətdaram.
İLHAM ƏLİYEV: Nəqliyyat sektorunda o qədər böyük işlər görülür ki, bəlkə də, bir saat da kifayət etməyəcəkdir. Siz ancaq görülən işlərin sadalanması ilə çıxışınızı yekunlaşdırdınız. Görün, nə qədər böyük işlər görülübdür. Hələ bir hissə qaldı, onu növbəti dəfə müzakirə edəcəyik. Amma doğrudan da, indi Azərbaycanda nəqliyyatda ən böyük inkişaf var. Həm bölgədə yerləşən ölkələrə nisbətən, eyni zamanda, ölkə daxilində, deyə bilərəm ki, ən dinamik inkişaf edən sahədir. Bu da təbiidir, çünki qeyd etdiyim kimi, Azərbaycanın əlverişli coğrafi vəziyyəti əlbəttə, bizim imkanlarımızı artırır. Ancaq bundan istifadə etmək üçün çox güclü nəqliyyat infrastrukturu - dəmir yolu, hava nəqliyyatı, dəniz nəqliyyatı və avtomobil yolları olmalıdır. Ona görə burada vəziyyət çox müsbətdir.
Bölmənin digər xəbərləri
