Nərimanov rayonunda Xocalı soyqırımının 21-ci ildönümünə həsr olunmuş tədbir keçirilmişdir
Bakı, 25 fevral (AZƏRTAC). Nərimanov Rayon İcra Hakimiyyətində (RİH) Xocalı soyqırımının 21-ci ildönümünə həsr olunmuş anma tədbiri keçirilmişdir.
RİH-dən AZƏRTAC-a bildirmişlər ki, əvvəlcə Xocalı faciəsi qurbanlarının və ölkəmizin müstəqilliyi və torpaqlarımızın bütövlüyü uğrunda şəhid olmuş Vətən övladlarının xatirəsi bir dəqiqəlik sükutla yad edilmişdir.
Tədbiri giriş sözü ilə açan RİH-in başçısı Abdin Fərzəliyev Xocalı faciəsinin səbəbləri haqqında ətraflı məlumat vermişdir. Qeyd edilmişdir ki, erməni cəlladları və onların havadarlarının Xocalıda törətdikləri qırğınlar XX əsrin ən qanlı faciələrindən biridir.
Vurğulanmışdır ki, bir gecədə Xocalının yer üzündən silinməsində keçmiş Sovet ordusunun 366-cı motoatıcı alayı da yaxından iştirak edərək şəhərin dinc əhalisinə divan tutulmasında canfəşanlıq göstərmiş, nəticədə görünməmiş vəhşiliklər törədilmişdir. Bu qanlı faciə 613 nəfər qətlə yetirilmiş, meyitlər təhqir olunmuş, 1275 nəfər girov götürülmüşdür. Onlardan 150 nəfərinin taleyi hələ də məlum deyildir. Qətlə yetirilənlərin 63-ü uşaq, 106-sı qadın, 70-i ahıl və qoca idi. Hərbi təcavüz nəticəsində səkkiz ailə tamamilə məhv edilmiş, 25 uşaq hər iki valideynini, 130 nəfər valideynlərindən birini itirmişdir. Qadınlar, qocalar, uşaqlar, hətta südəmər körpələr qəddarlıqla qətlə yetirilmiş, süngüdən keçirilmişlər.
Diqqətə çatdırılmışdır ki, Xocalı haqqında həqiqətlərin dünyada bilinməsi və bu faciənin xalqımıza qarşı soyqırımı aktı kimi tanınması üçün Azərbaycan dövləti bütün zəruri addımları atır. Bu sahədə məqsədyönlü fəaliyyət ümummilli lider Heydər Əliyev Azərbaycanda siyasi hakimiyyətə qayıdandan sonra başlanmışdır. Ulu öndərin təşəbbüsü ilə Xocalı soyqırımına siyasi-hüquqi qiymət verilmiş, fevralın 26-sı “Xocalı soyqırımı günü” elan edilmişdir. Ulu öndər Heydər Əliyevin məqsədyönlü fəaliyyəti sayəsində Xocalı soyqırımının dünyaya tanıdılması istiqamətində xeyli iş görülmüşdür. Ümummilli lider hər il faciənin ildönümündə Xocalı soyqırımı ilə bağlı xalqa müraciət etmiş, faciənin bütün azərbaycanlıların qan yaddaşına çevrildiyini daim vurğulamışdır.
Milli Məclisin deputatı Adil Əliyev bildirmişdir ki, Azərbaycan Respublikasının Prezidenti İlham Əliyevin inamla həyata keçirdiyi daxili və xarici siyasət, erməni qəsbkarlığının ifşasına yönəlmiş uğurlu addımlar bəhrəsini verməkdədir. Xocalı soyqırımı haqqında həqiqətlərin dünya ictimaiyyətinə çatdırılması, Azərbaycan xalqı və ümumən insanlıq əleyhinə törədilmiş bu son dərəcə ağır hərbi cinayətin beynəlxalq miqyasda siyasi-hüquqi qiymətini alması məsələsi dövlət siyasətinin mühüm istiqamətini təşkil edir.
Xocalıdan olan şəhid ailəsinin üzvü Mehriban Əliyeva bütün qaçqın və məcburi köçkünlərin, şəhid ailələrinin, müharibə əlillərinin, o cümlədən də Xocalı sakinlərinin ötən müddətdə hərtərəfli dövlət qayğısı ilə əhatə olunduqlarını vurğulamışdır.
Digər çıxış edənlər də Azərbaycanın haqq səsinin eşidiləcəyinə, ermənilərin mənfur əməllərinin beynəlxalq səviyyədə qınaq obyektinə çevriləcəyinə, Xocalı qətliamının təqsirkarlarının haqlı cəzalarına çatacağına, xalqımızın işğal altındakı bütün torpaqlarını yağı düşməndən tezliklə azad edəcəyinə, əzəli torpaqlarımızdan didərgin düşmüş həmvətənlərimizin öz ata-baba yurdlarına qayıdacaqlarına və ölkəmizin ərazi bütövlüyünün bərpa olunacağına ümidvar olduqlarını bildirmişlər.
Tədbir Odlar Yurdu Universitetinin tələbələrinin hazırladıqları Xocalı soyqırımına həsr olunmuş “Son güllə” adlı ədəbi-bədii kompozisiya ilə davam etdirilmişdir.
Bölmənin digər xəbərləri
