“NİKA” BAKIYA GƏLİR
Həmyerlimizin Azərbaycanda neft hasilatı tarixini çox qısa və obrazlı şəkildə canlandırmış “Neft” filmi bu günlərdə Moskvada Rusiya Kino Sənəti Akademiyasının məşhur “Nika” mükafatını almaq üçün keçirilmiş sənədli filmlər müsabiqəsində ən yaxşı film hesab edilmişdir.
Xatırladaq ki, bu yaxınlarda həmin film planetin baş kinoforumlarından biri olan Venesiya festivalında sənədli filmlər müsabiqəsinin qalibi olmuşdur.
“Neft” filminin rejissoru gənc olsa da, artıq kifayət qədər məşhurdur. Rusiya Dövlət Kinematoqrafiya İnstitutunun məzunu Murad İbrahimbəyovun “Gənc qadın üçün kişi”, “Olmuş əhvalatlar”, “Qaçmaq niyyətində idim” və s. bədii filmləri bir çox ölkələrdə kinosevərlər arasında məşhurdur. Həmyerlimizin filmləri Venesiya və Moskva kinofestivalları ilə yanaşı, digər nüfuzlu kinoforumlarda – Kolumbiyanın Beynəlxalq “Boqota”, “Kinoşok” kinofestivallarında və digər kino-baxışlarda qalib gəlmişdir.
“Nika” mükafatının təntənəli təqdimetmə mərasimində Murad İbrahimbəyov demişdir: “ Bu film mənim ölkəm, mənim millətim barədədir və “Nika” mütləq Bakıya gedəcəkdir”.
Bölmənin digər xəbərləri
