NİKOLA SARKOZİ SURİYA PREZİDENTİNİ QƏBUL ETMİŞDİR
AZƏRTAC-ın xüsusi müxbiri Yelisey sarayının mətbuat xidmətinin məlumatına istinadla xəbər verir ki, Fransa prezidenti Nikola Sarkozi Aralıq dənizi ölkələrinin sammiti və ölkənin milli bayramı ilə əlaqədar Parisdə üçgünlük səfərdə olan suriyalı həmkarı Bəşər əl-Əssədi qəbul etmişdir.
Görüşdə tərəflər siyasi, iqtisadi, mədəni, o cümlədən dil, akademiya və təhsil sahəsində Fransa ilə Suriya arasında əlaqələrin genişləndirilməsi ilə bağlı fikir mübadiləsi aparmışlar.
Ölkə başçıları Türkiyənin vasitəçiliyi ilə Suriya-İsrail danışıqlarının regionda sülhün bərqərar olmasında xüsusi əhəmiyyətini qeyd etmişlər.
Nikola Sarkozi Avropa İttifaqına sədrliyə başlamış Fransanın qurumla Suriya arasında bəzi prosedurların ratifikasiya edilməsinə səy göstərəcəyini vurğulamışdır.
Görüşdə hər iki prezident Suriya ilə Livan arasında diplomatik əlaqələrin bərpa edilməsinin vacibliyini bildirmişlər.
Bölmənin digər xəbərləri
