Nikoloz Samxaradze: Azərbaycanın və Gürcüstanın hakim partiyalarının dostluq münasibətləri xalqlarımızın rifahına xidmət edir
Tbilisi, 21 noyabr, AZƏRTAC
Azərbaycanın və Gürcüstanın hakim partiyaları arasında çox yaxşı münasibətlər var. Biz təkcə ikitərəfli deyil, beynəlxalq müstəvidə də bir çox məsələlərdə birgə mövqedən çıxış edirik.
Bu sözləri AZƏRTAC-a müsahibəsində Gürcüstanın hakim "Gürcü arzusu-demokratik Gürcüstan" partiyasının üzvü, parlamentin beynəlxalq münasibətlər və parlamentlərarası əlaqələr komitəsinin sədri Nikoloz Samxaradze söyləyib.
Yeni Azərbaycan Partiyasının (YAP) yaradılmasının 31-ci ildönümü münasibətilə təbriklərini çatdıran komitə sədri deyib ki, YAP Gürcüstanla əlaqələrin inkişafında mühüm rol oynayır.
"Yeni Azərbaycan Partiyasından olan dostlarımızı yubiley münasibətilə təbrik edirəm. Onlara bu şərəfli yolda uğurlar arzulayıram. Biz öz xalqımıza nə arzu ediriksə, dost və qardaş Azərbaycan xalqına da eynisini arzu edirik. Regionda sülh və firavanlıq olmasını diləyirəm", - deyə N.Samxaradze vurğulayıb.
Komitə sədri deyib: "Son illərdə Azərbaycan-Gürcüstan münasibətləri daha da inkişaf edib, güclənib. İnanıram ki, bizim partiyalar arasında əməkdaşlıq daha da güclənəcək. Bizim birliyimiz xalqlarımız arasında dostluq və qardaşlıq münasibətlərinin daha da möhkəmlənməsinə xidmət edir".
Xətayi Əzizov
AZƏRTAC-ın xüsusi müxbiri
Tbilisi
Bölmənin digər xəbərləri
