“Nils” fırtınası Fransada ciddi problemlər yaradıb
Paris, 12 fevral, AZƏRTAC
“Nils” fırtınası Fransanın cənubunu cənginə alıb. Güclü külək, daşqın və qar uçqunu riski ilə əlaqədar bir sıra bölgələrdə qırmızı və narıncı xəbərdarlıqlar elan edilib.
AZƏRTAC xəbər verir ki, fevralın 11-dən 12-nə keçən gecə Land bölgəsində küləyin sürəti saatda 160 kilometri ötüb. Jirond və Lo-e-Qaronn departamentlərində daşqın, Od və Pireney-Oryantalda güclü külək, Savoiedə isə qar uçqunu riski ilə bağlı qırmızı xəbərdarlıq qüvvədədir. Ümumilikdə 30-a yaxın departamentdə narıncı səviyyədə xəbərdarlıq elan olunub.
Fırtına insanların ölümünə də səbəb olub. Dax yaxınlığında ağac budağının yük maşınının üzərinə düşməsi nəticəsində 1 sürücü həyatını itirib, bir neçə departamentdə isə xəsarət alanlar var.
Elektrik təchizatçısı olan “Enedis”in məlumatına görə, səhər saatlarında 850 mindən çox ev elektrik enerjisiz qalıb. Ən çox zərər çəkən bölgələr Yeni Akvitaniya və Oksitaniyadır. Şirkət 1000 texnik və 400 podratçı əməkdaşın səfərbər edildiyini bildirib.
Fırtına nəqliyyat sisteminə də ciddi təsir göstərib. Parisdə Montparnasse vağzalından Dax, Bayonne, Biarritz və Hendaye istiqamətində qatarlar Bordoda dayanır. Cənub-qərb bölgəsində bir çox qatar reysləri ləğv edilib, Bayonne, Biarritz və Hendaye stansiyalarında hərəkət tam dayandırılıb. Bordoda tramvayların hərəkət qrafiki də pozulub. Oksitaniyada Narbonne–Perpignan xətti üzrə hərəkət dayandırılıb, bir çox reyslər gecikir.
Korsikada isə hava, dəniz və ictimai nəqliyyatda ciddi problemlər yaranıb. “Air Corsica” Figari” və “Calvi” bütün reysləri ləğv edib. Bastia, Ayaço və Paris arasında səhər uçuşları da dayandırılıb. 130-dan çox məktəb marşrutu ləğv edilib, dəniz əlaqələrinin böyük hissəsi təxirə salınıb və ya ləğv olunub.
“Nils” fırtınası Lion körfəzi istiqamətində irəliləyir və Korsikaya doğru hərəkət edir. Pyrenees-Orientales bölgəsində küləklə bağlı qırmızı xəbərdarlıq ehtimalı istisna olunmur. 27 departamentdə isə narıncı xəbərdarlıq qüvvədə qalacaq.
Bölmənin digər xəbərləri
