“Nizami” layihəsinin yekun görüşündə doktorantura təhsili üzrə nəticələr yüksək qiymətləndirilib
Bakı, 12 aprel, AZƏRTAC
Aprelin 12-də Bakıda Avropa Komissiyasının maliyyə dəstəyi ilə 2015-ci ildən həyata keçirilən “Azərbaycanda doktorantura təhsilinin Avropa ali təhsil məkanının tələblərinə uyğun yenidən qurulması və inkişaf etdirilməsi - “Nizami” layihəsinin yekunlarına həsr olunan tədbir keçirilib.
AZƏRTAC xəbər verir ki, tədbirdə Təhsil Nazirliyi aparat rəhbərinin müavini Yaqub Piriyev layihənin əhəmiyyətindən danışıb. Bildirib ki, Təhsil Nazirliyinin, AMEA-nın və doqquz ali təhsil müəssisəsinin, eləcə də Avropanın beş aparıcı universitetinin iştirak etdiyi “Nizami” milli layihəsinin əsas məqsədi Azərbaycanda doktorantura təhsilinin təşkili qaydalarının yenidən hazırlanması, ixtisas təsnifatının Avropada mövcud olan təsnifata uyğunlaşdırılmasıdır.
Y.Piriyev Avropa və Azərbaycan universitetləri arasında təcrübə mübadiləsi ilə üç il yarım davam etmiş (2015-2019) layihə çərçivəsində Azərbaycanda doktorantura təhsilinin Avropa ali təhsil sahəsinin tələblərinə uyğun yenidən qurulması və inkişaf etdirilməsi istiqamətində tərəfdaş qurumların birgə iş apardığını və ölkəmizin Avropa təhsil sisteminə inteqrasiyasının təşkil olunduğunu söyləyib.
O, Azərbaycanda doktorantura təhsili sistemində aparılan məqsədyönlü islahatlardan danışaraq, bu sahədə müasir dövrün çağırışlarından irəli gələn vəzifələri diqqətə çatdırıb, görülmüş işlərin yüksəkixtisaslı gənc kadrların hazırlanmasına yönəldiyini bildirib.
“Nizami” layihəsinin uğurla başa çatdığını deyən Y.Piriyev layihəni Fransa ilə Azərbaycan arasında humanitar sahədə əməkdaşlığın inkişafına mühüm töhfə kimi dəyərləndirib.
Sonra çıxış edən AMEA-nın akademik-katibi, İnformasiya Texnologiyaları İnstitutunun direktoru, akademik Rasim Əliquliyev akademiyanın “Nizami” layihəsinin hədəflərinə və qarşıya qoyulan məsələlərin həllinə xüsusi diqqət yetirdiyini bildirib.
Rəyasət Heyətinin qərarı ilə AMEA-da “Nizami” layihəsinə dəstək üçün işçi qrupunun təşkil olunduğunu söyləyən R.Əliquliyev son 3 il ərzində Rəyasət Heyətinin məsul şöbələrinin rəhbərlərinin bu layihədə müntəzəm iştirak etdiyini deyib.
Ölkəmizdə elm və təhsilin XXI əsrin çağırışlarına uyğun inkişaf etdirilməsinin vacibliyini qeyd edən alim Azərbaycanda dövlət başçısının rəhbərliyi ilə bu istiqamətdə mühüm tədbirlərin həyata keçirildiyini, boloniya sistemi əsasında bakalavr və magistr səviyyələri üzrə əhəmiyyətli nəticələrin əldə olunduğunu bildirib. O, bu gün Azərbaycanın ali təhsil müəssisələrinin yetişdirdiyi kadrların daxili əmək bazarı ilə yanaşı, dünya bazarında da böyük nüfuz əldə etdiyini vurğulayıb.
“Prezident İlham Əliyevin həyata keçirdiyi siyasətin əsas prioritetlərindən biri ölkəmizdə biliklər cəmiyyəti və iqtisadiyyatı, eləcə də yüksək texnologiyalar cəmiyyətinin formalaşdırılmasıdır”, - deyən AMEA-nın akademik-katibi Azərbaycan təhsil sisteminin Avropa dəyərlərinə transformasiyası, onun dünyanın inkişaf tempinə uyğunlaşdırılmasının vacib məsələlərdən olduğunu bildirib, “Nizami” layihəsinin qeyd olunan məqsədlərə xidmət etdiyini vurğulayıb.
Tədbirin rast gəlinən problemlərin müzakirəsi baxımından böyük əhəmiyyətə malik olduğunu söyləyən akademik R.Əliquliyev bu istiqamətdə mütəmadi olaraq dəyirmi masaların təşkili və əlaqədar qurumların birgə fəaliyyətinin önəmini qeyd edib. O, həmçinin layihə çərçivəsində rəhbərlik etdiyi institutun dəstəyi ilə doktorantura təhsilinin idarəolunması, elektron hökumətin tərkib hissəsi kimi yaradılmış portalın əhəmiyyətindən danışıb. Bu sistemin doktorantura təhsili ilə bağlı statistik-analitik analizlərin aparılması, bu istiqamətdə müvafiq qərarların qəbul edilməsi, eləcə də Azərbaycanda formalaşan onlayn mühitə inteqrasiya kimi vəzifələrin icrasını nəzərdə tutduğunu deyib.
Daha sonra Azərbaycanda Milli “Erasmus+” ofisinin rəhbəri Pərviz Bağırov layihə çərçivəsində görülmüş işlər barədə məlumat verib. Ofis rəhbəri “Erasmus+” proqramının Azərbaycan üçün prioritet sahələrinin kurikulum quruculuğu, Avropa standartları çərçivəsində təhsil sahəsində birgə təcrübə mübadiləsinin aparılması və ali təhsil müəssisələrinin idarəedilməsi və fəaliyyətinin təkmilləşdirilməsindən ibarət olduğunu vurğulayıb.
Fransanın ölkəmizdəki səfirliyinin əməkdaşlıq və mədəniyyət üzrə müşaviri Johan Şitterer ölkəsi ilə Azərbaycan arasında siyasi, elmi, iqtisadi və digər sahələrdə əlaqələrin daim genişləndiyini söyləyib. Azərbaycan ilə Fransa arasında elm və təhsil sahəsində əməkdaşlığın tarixi köklərə əsaslandığını deyən müşavir iki ölkə arasında təhsil sahəsində əməkdaşlığın uğurlu nümunəsi kimi regionda bu qəbildən ilk olan Azərbaycan-Fransız Universitetinin təsis olunması və fəaliyyətini xüsusi qeyd edib.
J.Şitterer ötən il AMEA ilə Fransanın Montpelye Universiteti arasında imzalanmış əməkdaşlıq haqqında çərçivə sazişini, əməkdaşlıq və dissertasiya maliyyələşdirilməsi haqqında sazişi də xatırladıb. Bildirib ki, sənədə əsasən, tərəflər birgə doktorant və tədqiqatçıların mübadiləsini həyata keçirir, ortaq elmi araşdırmalar aparırlar.
Tədbirdə “Nizami” layihəsinin koordinatoru, Montpelye Universitetinin professoru Veronique Montero “Doktorantura təhsili üzrə Fransa təcrübəsi”, Azərbaycan Respublikası Təhsil Nazirliyinin elm sektorunun müdiri Anar Kazımov “Nizami layihəsi: əldə olunmuş nəticələr və yeni perspektivlər” və AMEA Rəyasət Heyəti aparatının beynəlxalq əlaqələr idarəsinin rəisi, biologiya üzrə fəlsəfə doktoru Esmira Əlirzayeva “Milli idarəetmə portalı” mövzusunda məruzələrini təqdim ediblər. Məruzələrdə layihənin ümumi məqsədinin Avropa universitetləri ilə mübadilə təşkil edərək Azərbaycanda doktorantura təhsilinin yenidən qurulması, PhD-nin mükəmməlliyinin artırılması, Azərbaycanı yüksək keyfiyyətli doktorantura təhsili ilə təmin etmək (tədqiqat, innovasiya və təhsil əlaqələri sayəsində) və ali təhsil müəssisələri arasında əməkdaşlığı möhkəmləndirmək olduğu bildirilib.
Sonda tərəfdaş ali təhsil müəssisələrində “Nizami” layihəsi çərçivəsində həyata keçirilmiş tədbirlər barədə məlumat verilib, geniş müzakirələr aparılıb.
Bölmənin digər xəbərləri
