“Nizamişünaslıq” elmi əsərlər jurnalının növbəti nömrəsi nəşr edilib
Bakı, 28 dekabr, AZƏRTAC
AMEA Gəncə Bölməsinin Nizami Gəncəvi Mərkəzinin “Nizamişünaslıq” elmi əsərlər jurnalının 11-ci nömrəsi çapdan çıxıb.
AMEA-dan AZƏRTAC-a bildirilib ki, jurnalda dahi Azərbaycan şairi və mütəfəkkiri Nizami Gəncəvinin həyatı və yaradıcılığı, əsərlərinin tədqiqi tarixi, tədqiqatçıları, mövzu və ideyası, “Xəmsə”də jestlərin semiotikası, Şərq poeziyasındakı mövqeyi, təsir dairəsi, əlyazmalarının tarixi kimi mühüm mövzuları əhatə edən məqalələr yer alıb.
“Nizamişünaslıq” elmi əsərlər jurnalı ildə iki dəfə çap olunmaqla Azərbaycan, ingilis, rus və digər dillərdə məqalə qəbul edir.
Jurnalın nüsxələri müvafiq kitabxanalara paylanılmaqla, elektron variantı da ayrıca olaraq internet saytına yerləşdirilir. Jurnal Beynəlxalq Standart Seriya Nömrəsi (ISSN), Rəqəmsal Obyekt İdentifikatoru (DOI) standartları ilə nəşr olunmaqla yanaşı, Azərbaycan Respublikasının Prezidenti yanında Ali Attestasiya Komissiyasının filologiya elmləri üzrə tövsiyə olunan dövri elmi nəşrlər siyahısına da daxildir.
“Nizamişünaslıq” elmi əsərlər jurnalı ilə tanış olmaq və əldə etmək istəyənlər jurnalın saytına daxil olub istifadə edə bilərlər.
Jurnalda məqalələrin nəşrinə qoyulan tələblər hər bir sayın son səhifəsində üç dildə yerləşdirilib və məqalə göndərmək üçün [email protected] elektron poçtu qeyd edilib.
Bölmənin digər xəbərləri
