Norveçdə keçirilən seçkilərdə seçicilərin təxminən yarısı vaxtından əvvəl səs verib
Stokholm, 6 sentyabr, Nərgiz Cəfərli, AZƏRTAC
Norveçdə parlament seçkiləri bazar ertəsi, sentyabrın 8-də keçiriləcək, lakin vaxtından əvvəl səsvermə artıq rekord qırıb.
AZƏRTAC xəbər verir ki, Seçki İdarəsindən verilən məlumata görə, indiyədək 1 milyon 912 min 194 nəfər vaxtından əvvəl səs verib. Bu, səsvermə hüququ olanların 47,1 faizini və 2021-ci il seçkiləri səviyyəsində gözlənilən fəallığın 61 faizindən çoxunu təşkil edir.
Sentyabrın 5-də rekord sayda - 201 mindən çox insan vaxtından əvvəl səs verib. Seçicilər xüsusilə Osloda fəallıq göstəriblər. Burada seçici fəallığı 53,2 faiz təşkil edib. Hordalandda bu göstərici 51,9 faiz olub. Ən aşağı fəallıq isə Telemarkda müşahidə edilib: cəmi 37,9 faiz.
Vaxtından əvvəl səsverməyə maraq son onilliklərdə tədricən artsa da, bu tendensiya xüsusilə 2021-ci ildə - pandemiya dövründə kəskin şəkildə yüksəlib. O vaxtdan bəri əvvəlcədən səsvermə əksər seçicilər üçün bir vərdişə çevrilib. Cari seçkilərdə də bu meyil davam edir və əvvəlki illərlə müqayisədə daha da gücləndiyini göstərir.
Bölmənin digər xəbərləri
